मलेसिया पठाउने नाममा युवाहरूबाट करोडौं रुपैयाँ ठगी गरेको आरोपमा द–रिभर ओभरसिज प्राइभेट लिमिटेडको गौशालास्थित कार्यालयमा वैदेशिक रोजगार विभाग र प्रहरीले छापा मारेका छन्।
सरकारले मलेसियाका लागि ‘फ्रि भिसा, फ्रि टिकट’ व्यवस्था गरे पनि द–रिभर ओभरसिजले प्रतिव्यक्ति लाखौं रुपैयाँ मागेको उजुरी परेको छ।
म्यानपावरले मोटो रकम ठगी गरेको भन्दै पीडितहरूले प्रधानमन्त्री कार्यालय र श्रम, रोजगार तथा सामाजिक सुरक्षा मन्त्रालयमा उजुरी दिएका थिए। सोही उजुरीका आधारमा विभागले प्रहरीको सहयोगमा कारबाही अघि बढाएको हो।
छापा मार्ने क्रममा विभागको टोलीले म्यानपावर कार्यालयबाट राहदानी बरामद गरेको छ। मन्त्रालय र विभागमा परेका उजुरीहरूका आधारमा म्यानपावरमाथि निगरानी बढाई कारबाही अघि बढेको स्रोतले जनायो।
यद्यपि, वैदेशिक रोजगार विभागकी महानिर्देशक मिरा आचार्यले यसलाई नियमित अनुगमनको रूपमा व्याख्या गरिन्। उनले विभागले क्षेत्राधिकारभित्र रहेर बदमासी गर्ने म्यानपावरहरूलाई अनुगमन गरी कारबाहीको दायरामा ल्याउने गरेको बताइन्।
महानिर्देशक आचार्यका अनुसार, पछिल्लो एक सातायता कुनै नयाँ छापा मारिएको छैन। उनले भनिन्, ‘विभागले ऐनले दिएको क्षेत्राधिकारमा टेकेर बदमासी गर्ने म्यानपावरहरूको अनुगमन गर्छ, तर कुनै विशेष छापा मार्ने काम भएको छैन।’
द–रिभर ओभरसिज विरुद्ध परेको उजुरी र बरामद भएका राहदानीबारे विभागले थप अनुसन्धान गरिरहेको छ।
