चीनको उत्तरी तिब्बत क्षेत्रमा बिहीबार राति ७ म्याग्निच्युडको भूकम्प गएपछि चीनले आपतकालीन प्रतिक्रिया सुरु गरेको छ।
नेपाली समयअनुसार राति ८:१८ बजे गएको भूकम्पको केन्द्रबिन्दु दक्षिणपश्चिम चीनको सिजाङ स्वायत्त क्षेत्रअन्तर्गत नाग्कु सहरको बाकेन काउन्टीमा रहेको थियो। चीन भूकम्प नेटवर्क केन्द्र (सीईएनसी) का अनुसार भूकम्प जमिनको सतहबाट करिब १० किलोमिटर गहिराइमा गएको थियो।
यस भूकम्पको धक्का चीनसहित भारत र म्यानमारमा पनि महसुस गरिएको थियो। रोयटर्सका अनुसार यो जनवरी २०२४ पछि चीनमा गएको सबैभन्दा शक्तिशाली भूकम्प हो।
भूकम्पबाट भएको मानवीय तथा भौतिक क्षतिको विवरण भने अहिलेसम्म सार्वजनिक भएको छैन। चिनियाँ अधिकारीहरूले प्रभावित क्षेत्रको अवस्था र सम्भावित क्षतिको विवरण संकलन गरिरहेका छन्।
केन्द्रबिन्दु आसपासको क्षेत्र समुद्री सतहबाट औसत चार हजार ८६४ मिटर उचाइमा रहेको छ, जुन दुर्गम र उच्च पहाडी क्षेत्र हो। अमेरिकी भूगर्भ सर्वेक्षण (यूएसजीएस) ले पनि तिब्बतमा ७ म्याग्निच्युडको भूकम्प गएको पुष्टि गरेको छ।
यसअघि सन् २०१० मा चीनको छिङहाई प्रान्तको युशु क्षेत्रमा ७.१ म्याग्निच्युडको भूकम्प गएको थियो, जसमा कम्तीमा दुई हजार ६९८ जनाको मृत्यु भएको थियो र करिब ३०० जना बेपत्ता भएका थिए।
