टिकटकलाई ४० करोड डलर जरिवाना: बालबालिका गोपनीयता उल्लंघनको ठूलो मुद्दा किनारा
भिडियो सेयरिङ प्लेटफर्म टिकटकले बालबालिकाको गोपनीयताको अधिकार उल्लंघन गरेको आरोपमा अमेरिकालाई ४० करोड अमेरिकी डलर तिर्न सहमति जनाएको छ। यो सम्झौता सन् २०२४ मा अमेरिकी न्याय मन्त्रालयद्वारा दायर गरिएको मुद्दाको परिणाम हो। टिकटक र यसको मातृ कम्पनी बाइटडान्समाथि बाल अनलाइन गोपनीयता संरक्षण ऐन (सीओपीपीए) उल्लङ्घन गरेको आरोप थियो।
यो जरिवाना बाल गोपनीयतासम्बन्धी मुद्दामा अहिलेसम्मकै सबैभन्दा ठूलो क्षतिपूर्तिमध्ये एक भएको न्याय मन्त्रालयले जनाएको छ। सम्झौताअनुसार, टिकटकले तुरुन्तै ३० करोड अमेरिकी डलर भुक्तानी गर्नेछ। टिकटकको पूर्ववर्ती म्युजिकल्लीविरुद्धको सहमति आदेश खारेज भएपछि थप १० करोड डलर भुक्तानी हुनेछ।
सीओपीपीए ऐनले १३ वर्षमुनिका बालबालिकाको व्यक्तिगत जानकारी अभिभावकको अनुमतिबिना सङ्कलन गर्न वेबसाइटहरूलाई प्रतिबन्ध लगाउँछ। न्याय मन्त्रालय र संघीय व्यापार आयोगले संयुक्त रूपमा मुद्दा दायर गरेका थिए। टिकटकले अभिभावकको अनुमतिबिना बालबालिकाको तथ्याङ्क सङ्कलन गरी लाखौँ बालबालिकाको सुरक्षालाई जोखिममा पारेको आरोप थियो।
विश्वभरका नियामक निकायहरूले बालबालिकाको तथ्याङ्क, गोपनीयता र सुरक्षासम्बन्धी कानुन उल्लङ्घन गर्ने सामाजिक सञ्जाल कम्पनीहरूविरुद्ध कारबाही तीव्र बनाएका छन्। चिनियाँ कम्पनी बाइटडान्सले ट्रम्प प्रशासनको प्रतिबन्धबाट बच्न यस वर्षको सुरुमा आफ्नो अमेरिकी एकाईको बहुमत सेयर बिक्री गरेको थियो। यो जरिवानाका लागि टिकटकको अमेरिकी एकाई ‘टिकटक युएस’ पनि जिम्मेवार हुनेछ। टिकटक युएसको टिकटकमा १९.९ प्रतिशत स्वामित्व रहेको अमेरिकी सञ्चारमाध्यमले जनाएका छन्।
