गण्डकी, लुम्बिनी र कर्णाली प्रदेशका हिमाल, पहाडी र तराई भूभागमा आज भारी वर्षाको सम्भावना छ। मौसम पूर्वानुमान महाशाखाले देशभर मनसुनी वायुको प्रभाव रहने जनाएको छ। मनसुनको न्यून चापीय रेखा पश्चिममा सरदरभन्दा केही माथि नेपालको तराई नजिक छ।
कोशी, बागमती, गण्डकी र लुम्बिनी प्रदेशका केही स्थानमा भारी वर्षाको सम्भावना छ। मधेस, कर्णाली र सुदूरपश्चिम प्रदेशका एक–दुई स्थानमा हल्कादेखि मध्यमसम्मको वर्षा भइरहेको छ।
दिउँसो देशभर बादल लाग्नेछ। हिमाली भूभागका थोरै स्थानमा चट्याङसहित वर्षाको सम्भावना छ। पहाडी भूभागका केही स्थानमा पनि चट्याङसहित वर्षाको सम्भावना छ।
कोशी, बागमती, गण्डकी र लुम्बिनी प्रदेशका तराईका केही स्थानमा चट्याङसहित वर्षाको सम्भावना छ। मधेस र सुदूरपश्चिम प्रदेशको तराई भूभागको थोरै स्थानमा पनि यस्तै वर्षाको आँकलन छ।
कोशी र बागमती प्रदेशको हिमाली भूभागमा भारी वर्षाको सम्भावना छ। कोशी, बागमती, गण्डकी, लुम्बिनी र कर्णाली प्रदेशको पहाडी भूभागमा पनि भारी वर्षाको आँकलन गरिएको छ। लुम्बिनी प्रदेशको तराई भूभागको एक–दुई स्थानमा भारी वर्षाको सम्भावना छ।
राति देशभर बादल लाग्नेछ। हिमाली भूभागका थोरै स्थानमा चट्याङसहित वर्षाको सम्भावना छ। गण्डकी, लुम्बिनी, कर्णाली र सुदूरपश्चिम प्रदेशका पहाडी र तराई भूभागका केही स्थानमा चट्याङसहित वर्षाको सम्भावना छ।
मधेस, कोशी र बागमती प्रदेशका पहाडी र तराई भूभागका थोरै स्थानमा पनि चट्याङसहित मध्यमसम्म वर्षाको सम्भावना छ। गण्डकी, लुम्बिनी र कर्णाली प्रदेशका हिमाल, पहाडी र तराई भूभागको एक–दुई स्थानमा भारी वर्षाको सम्भावना रहेको छ। यसबाट जोगिन र सतर्क रहन मौसमविद्हरूले आग्रह गरेका छन्।
