काठमाडौं । ट्राफिक नियम मिच्नेलाई हालको ५ सयदेखि १५ सय रुपैयाँ जरिवानालाई बढाएर अधिकतम ५० हजार रुपैयाँसम्म पुर्याउनुपर्ने प्रस्ताव गरिएको छ। उपत्यका ट्राफिक प्रहरी कार्यालयका प्रहरी वरिष्ठ उपरीक्षक (एसएसपी) सुरेशप्रसाद काफ्लेले यो प्रस्ताव गरेका हुन्।
सङ्घीय संसद्को पूर्वाधार विकास समितिको बैठकमा ‘सार्वजनिक सवारी र ढुवानी व्यवस्थापन’ सम्बन्धी कार्यपत्र प्रस्तुत गर्ने क्रममा काफ्लेले हालको जरिवाना रकम पर्याप्त नभएको औंल्याए। उनले जरिवानालाई हालको तुलनामा ३३ गुणासम्म बढाएर ५० हजार रुपैयाँसम्म पुर्याउनुपर्ने आवश्यकता औंल्याएका हुन्।
एसएसपी काफ्लेले पूर्वाधार विकास समितिको बैठकमा स्पष्ट पारे अनुसार, हालको जरिवाना रकमले ट्राफिक नियम उल्लंघन गर्नेलाई निरुत्साहित गर्न पर्याप्त नभएको निष्कर्ष छ। यस प्रस्तावमाथि पूर्वाधार विकास समितिमा छलफल हुनेछ।
