त्रियुगा नगरपालिका–१२, साधना टोलमा विषाक्त खानाले एउटै परिवारका चार जना बिरामी परेका छन्। २३ वर्षीया हेमा बुढाथोकीको अवस्था गम्भीर छ।
छिमेकी राधा बुढाथोकीका अनुसार हेमा, उनका ५ वर्षीय छोरा योगेश, १४ वर्षीया नन्द यशोदा र ९ वर्षीया नन्द यासिका बुढाथोकी खानाले बिरामी परेका हुन्। शनिबार हेमाले बजारबाट ल्याएको मुसुरोको दालसहितको खाना खाएकी थिइन्।
शनिबार रातिदेखि नै बान्ता र बेहोस हुने लक्षण देखिएपछि परिवारलाई जिल्ला अस्पताल उदयपुर लगिएको थियो। अस्पतालका अनुसार योगेश, यासिका र यशोदाको उपचारपछि घर फर्केका छन्।
विज्ञापन
तर, हेमाको अवस्था चिन्ताजनक भएकाले थप उपचारका लागि विराटनगर पठाइएको उदयपुरका प्रमुख डा. मुकेश झाले बताए। हेमाका श्रीमान् युवराज बुढाथोकी वैदेशिक रोजगारीमा विदेशमा छन्।
