त्रिपुरेश्वरस्थित राहदानी विभाग नजिक बा. ५ ख ४२७४ नम्बरको रिद्धिसिद्धी यातायातको बसमा आगलागी भएको घटनाको छानबिन गर्न प्रहरीले ५ सदस्यीय समिति गठन गरेको छ। उपत्यका प्रहरी कार्यालयका एसएसपी रमेश बस्नेतको नेतृत्वमा गठित समितिले पाँच दिनभित्र प्रतिवेदन बुझाउनेछ।
सोमबार दिउँसो सवा १२ बजे भएको घटनामा २५ वर्षीय बस चालक दावा लामा गम्भीर घाइते भएका छन्। प्रारम्भिक अनुसन्धानमा लामाले नै बसमा आगो लगाएको प्रहरीको आशंका छ। सुरक्षाकर्मीले ढोका फोडेर उनको उद्धार गरेका थिए।
लामाको शरीरको ९० प्रतिशतभन्दा बढी भाग जलेको छ। उनको कीर्तिपुरस्थित बर्न अस्पतालमा उपचार भइरहेको छ। चिकित्सकका अनुसार उनको अवस्था चिन्ताजनक छ।
प्रहरीका अनुसार आगलागी गर्नुअघि लामाले ट्राफिक प्रहरीसँग विवाद गरेका थिए। भिडियोमा उनले आफू मर्न तयार रहेको बताएको देखिन्छ। घटनाबारे थप अनुसन्धान भइरहेको प्रहरीले जनाएको छ।
नेपाल यातायात व्यवसायी राष्ट्रिय महासङ्घका अध्यक्ष पुण्यप्रसाद सिटौलाले सवारी साधनमा भइरहेका आगलागी र दुर्घटनामा निष्पक्ष छानबिन गर्न सरकारसँग माग गरेका छन्। उनले त्रिपुरेश्वरमा चालक र सवारी साधन दुवै जलेको घटनालाई राज्यले गम्भीरतापूर्वक लिनुपर्ने बताए।
सिटौलाले विद्युतीय सवारीसाधन (ईभी), माइक्रो बस तथा बसमा आगलागी हुँदा यात्रु र चालक समयमै बाहिर निस्कन नसक्ने अवस्था बनेको उल्लेख गरे। यस्ता घटनाको प्राविधिक अध्ययन गरी सार्वजनिक गर्न उनले माग गरेका छन्। ईभीमा आगलागी हुँदा ढोका नखुल्ने वा यात्रु बाहिर निस्कन कठिन हुने गरेको उनको भनाइ छ।
उनले आगामी दिनमा यस्ता घटना रोक्न सुरक्षा मापदण्ड, प्राविधिक परीक्षण र कारण पहिचानमा सरकारले तत्काल कदम चाल्नुपर्ने बताए। विद्युतीय सवारीसाधनमा आगलागी हुँदा कसरी सुरक्षित रूपमा बाहिर निस्कने भन्नेबारे सचेतना फैलाउन आवश्यक छ।
