उदयपुरको त्रियुगा नगरपालिका–११ पिपल चोकस्थित होटल ड्रिमलेण्डबाट प्रहरीले जुवा खेलिरहेका ६ जनालाई पक्राउ गरेको छ । जिल्ला प्रहरी कार्यालय उदयपुरको विशेष टोलीले होटलको तेस्रो तलाबाट उनीहरूलाई नियन्त्रणमा लिएको हो ।
प्रहरीले उनीहरूको साथबाट ५७ हजार ६ सय २५ रुपैयाँ नगद, तीन बुङ तास, छ थान मोबाइल र चार थान मोटरसाइकल बरामद गरेको छ । पक्राउ पर्नेहरूमा भलराज राई, चित बहादुर राई, बोध बहादुर थापा मगर, विजय राई, संजिब बुढाथोकी र पुर्ण बहादुर राई छन् ।
उनीहरू सबैलाई बरामद गरिएका सामग्रीसहित जिल्ला प्रहरी कार्यालय उदयपुरमा राखिएको छ । उनीहरूमाथि थप अनुसन्धान भइरहेको प्रहरीले जनाएको छ ।
