पूर्वमन्त्री उमाशंकर अरगरियाले नेकपा एमालेको साधारण सदस्य समेत नरहने गरी पार्टी परित्याग गरेका छन्। पार्टीभित्र इमान्दार कार्यकर्ताको अपमान र पार्टीविरुद्ध लाग्नेहरूको सम्मान हुने प्रवृत्तिले आफू आजित भएको उनले बताए।
पार्टी अध्यक्ष केपी शर्मा ओलीलाई सम्बोधन गरी बुझाएको राजीनामा पत्रमा अरगरियाले आफूसँगै एमाले प्रवेश गरेका कार्यकर्ताको उचित मूल्यांकन नभएको उल्लेख गरेका छन्। जिल्ला नेतृत्वबाट पटकपटक अपमानित हुनुपरेको व्यथा पनि उनले पोखेका छन्।
पार्टीको केन्द्रीय तहमा यसबारे जानकारी गराउँदा पनि कुनै पहल नभएपछि बाध्य भएर पार्टी छाड्नुपरेको उनको भनाइ छ। अरगरियाले एमाले परित्याग गरे पनि तत्काल कुनै पार्टीमा नजाने र स्वतन्त्र रूपमा जनताको बीचमा रहने घोषणा गरेका छन्।
अरगरिया २०७४ सालको प्रतिनिधिसभा निर्वाचनमा तत्कालीन संघीय समाजवादी फोरम नेपालबाट धनुषा-२ बाट निर्वाचित भएका थिए। २०७९ सालको निर्वाचनअघि उनी एमाले प्रवेश गरेका थिए।
०७९ को निर्वाचनमा उनी धनुषा-२ बाट नेपाली कांग्रेसका रामकृष्ण यादवसँग १५७ मतले पराजित भएका थिए। त्यसअघि २०७४ को निर्वाचनमा राष्ट्रिय स्वतन्त्र पार्टीका उम्मेदवार राम विनोद यादवसँग पराजित भएका थिए।
