संयुक्त राष्ट्रसंघीय शैक्षिक, वैज्ञानिक तथा सांस्कृतिक संगठन (युनेस्को) काठमाडौंले सोलुखुम्बुको खुम्बू पासाङल्हामु गाउँपालिका–५, थामेमा रहेका अभौतिक सम्पदाको सूचीकरण सुरु गरेको छ। संस्कृति, पर्यटन तथा नागरिक उड्डयन मन्त्रालयको सहकार्यमा यो प्रक्रिया अघि बढेको छ।
युनेस्कोका अनुसार, यस सूचीकरणले थामे क्षेत्रको सांस्कृतिक विविधता र परम्परागत ज्ञानको संरक्षण गर्नेछ। यसले स्थानीय समुदायको सांस्कृतिक पहिचानलाई बल पुर्याउने अपेक्षा गरिएको छ।
सूचीकरण प्रक्रियाको पहिलो चरणमा स्थानीय अगुवा र विज्ञहरूको टोलीले थामे क्षेत्रका महत्वपूर्ण अभौतिक सम्पदाहरूको पहिचान गर्नेछ। यस कार्यको प्रतिवेदन तीन महिनाभित्र संस्कृति मन्त्रालयमा बुझाइने छ।
