आठ विश्वविद्यालयका रिक्त उपकुलपति पदका लागि २१८ उम्मेदवारको आवेदनमाथि छनोट तथा सिफारिस समितिले छानबिन सुरु गरेको छ। समितिले आवेदकहरूको कागजात अध्ययन गरी स्वीकृत उम्मेदवारको सूची प्रकाशन गर्ने तयारी गरेको छ।
शिक्षा तथा खेलकुद मन्त्रालयमा रहेको समितिले गत वैशाख २५ गते १० दिनभित्र दरखास्त दिन आह्वान गरेको थियो। त्रिभुवन विश्वविद्यालयको उपकुलपतिमा सर्वाधिक ५० जनाले आवेदन दिएका छन्।
पूर्वाञ्चल र पोखरा विश्वविद्यालयमा ३८/३८, सुदूरपश्चिममा १९, मध्यपश्चिममा २०, लुम्बिनी बौद्धमा ११, कृषि तथा वन विज्ञानमा १५ र राजर्षि जनक विश्वविद्यालयमा २७ जनाले आवेदन बुझाएको मन्त्रालयले जनाएको छ।
गत वैशाख २४ गते स्वीकृत ‘विभिन्न विश्वविद्यालयको उपकुलपति छनोट तथा सिफारिससम्बन्धी एकीकृत कार्यविधि, २०८३’ अनुसार नयाँ नियुक्तिको प्रक्रिया अगाडि बढेको हो। यसअघि राष्ट्रपतिबाट जारी विशेष अध्यादेशबाट पदाधिकारीहरू पदमुक्त भएका थिए।
छनोट समितिको संयोजकमा शिक्षामन्त्री सस्मित पोखरेल छन्। सदस्यहरूमा शिक्षा सचिव चुडामणि पौडेललगायत सम्बन्धित विश्वविद्यालयका विज्ञहरू छन्।
