प्रतिनिधिसभा बैठकमा सांसदहरूले हालैका भीषण वर्षा, हावाहुरी र पहिरोका कारण विभिन्न जिल्लामा नागरिक तथा सडकहरू प्रभावित भएको विषयमा सरकारको ध्यानाकर्षण गराए। पीडितलाई तत्काल क्षतिपूर्ति र राहतको व्यवस्था गर्न माग गरिएको छ।
सांसद बलावती शर्माले बागलुङका विद्यालय र घरका छाना हावाहुरीले उडाएको र कृषिबालीमा प्रभाव पारेको भन्दै उचित क्षतिपूर्ति र राहतको माग गरिन्। सांसद गोविन्द पन्थीले गुल्मीको मालिका गाउँपालिका हावाहुरीबाट बढी प्रभावित भएकाले मूल्याङ्कन गरी राहत दिन आग्रह गरे।
सांसद भूमिका लिम्बू सुब्बाले मध्यपहाडी (पुष्पलाल) लोकमार्गका सडकखण्ड अवरुद्ध भएको र पहिरोले पूर्वी पहाडी जिल्लाको जनजीवन प्रभावित पारेको बताइन्। सांसद नरेन्द्रकुमार केरूङले बेमौसमी मनसुनले मध्यपहाडी (पुष्पलाल) लोकमार्गको फलैचाँ (दोभाने) क्षेत्रमा क्षति पुर्याएको उल्लेख गर्दै क्षतिको एकिन गरी निर्माण सुरु गर्न अनुरोध गरे।
सांसद क्षितिज थेबेले गत जेठ ८ गतेको वर्षाले ताप्लेजुङ र पाँचथरमा विपद्बाट प्रभावित जनतालाई क्षतिपूर्ति दिन माग गरे। सांसद प्रेमबहादुर बयकले अछामको रामारोशनमा वर्षा र पहिरोले दुई सय भेडाको क्षति गरेको जानकारी दिँदै पीडित किसानलाई राहत दिन अनुरोध गरे।
सांसद आशिष गजुरेलले बिपी राजमार्गमा वर्षा र बाढीले बालबालिकाको ज्यान गएकामा चिन्ता व्यक्त गरे। उनले विपद् व्यवस्थापनमा पूर्वसचेतना कार्य प्रभावकारी बनाउन सुझाव दिए।
सांसद सोम शर्माले विपद् जोखिम व्यवस्थापनमा सरकार गम्भीर हुनुपर्ने र ग्रामीण क्षेत्रका कच्ची घरमा जस्तापाता लगाइदिनुपर्ने बताए। सांसद सुशान्त वैदिकले प्युठान, रोल्पा र अर्घाखाँचीमा केही दिनदेखि बन्द भएको बिजुली तत्काल सुचारु गर्न आग्रह गरे। सांसद शम्भुप्रसाद ढकालले झापामा वर्षाले बिजुली प्रभावित पारेको र केराखेतीमा नोक्सानी भएकाले राहत दिन माग गरे।
सांसद रामविनोद यादवले धनुषामा स्वास्थ्यकर्मीको लापर्वाहीले एक गर्भवतीको निधन भएको घटनामा दुःख व्यक्त गरे। सांसद रेखाकुमारी यादवले सर्वोच्च अदालतको फैसलाविपरीत महोत्तरीको गौशलाका ३४ घरधुरी भत्काउन खोजिएकोमा आपत्ति जनाइन्।
यसैबीच, बागलुङको बडिगाड गाउँपालिकामा गएराति आएको भीषण हावाहुरी, असिनापानीसहितको वर्षाले दुई दर्जनभन्दा बढी घरमा क्षति पुर्याएको छ। घरका छाना उडेका छन्, भित्ता चर्किएका छन् र विद्युत अवरुद्ध भएको छ। खेतमा लगाएको मकैबाली असिनाले पूर्णरूपमा नष्ट गरेको छ। स्थानीयले प्रभावित परिवारलाई तत्काल राहत तथा पुनःस्थापनाको व्यवस्था गर्न माग गरेका छन्।
