विराटनगरको महेन्द्रचोकमा विद्यालय पोशाकमा हिँडिरहेका दुई युवतीलाई मोटरसाइकलमा आएका दुई पुरुषले अभद्र व्यवहार गरेका छन्। प्रहरीले घटनामा संलग्न मोरङका महेश कुमार मण्डल र बाराका अखिलेश कुमार प्रसादलाई पक्राउ गरेको छ।
मण्डल ३५ वर्षका हुन् भने प्रसाद ३३ वर्षका छन्। उनीहरूले शुक्रबार दिउँसो महेन्द्रचोकमा दुई युवतीलाई लक्षित गरी दुर्व्यवहार गरेका थिए।
घटनाको भिडियो सामाजिक सञ्जालमा सार्वजनिक भएपछि प्रहरीले उनीहरूलाई विराटनगरबाटै नियन्त्रणमा लिएको हो। जिल्ला प्रहरी कार्यालय मोरङले दुवै जनामाथि अभद्र व्यवहार मुद्दामा म्याद थप गरी अनुसन्धान गरिरहेको जनाएको छ।
