मधेस प्रदेश सरकार मन्त्रालय बाँडफाँटका विषयमा विवादका कारण पुनः संकटमा परेको छ। सरकारमा निर्णायक भूमिकामा रहेको नेकपाले अर्थ मन्त्रालय मागेको छ, तर मुख्यमन्त्री र एमाले तयार छैनन्।
मुख्यमन्त्री कृष्णप्रसाद यादवले गत शुक्रबार विश्वासको मत प्राप्त गरे। तर, मन्त्रालय बाँडफाँटमा नेकपा एमाले र नेकपाबीच सहमति जुट्न सकेको छैन। नेकपाले अर्थ मन्त्रालय आफूले पाउनुपर्ने अडान लिएको छ। मुख्यमन्त्री यादव र नेकपा एमाले यो अडानमा सहमत छैनन्।
अर्थ मन्त्रालय नपाए नेकपा प्रतिपक्षी दलहरूसँग मिलेर आफ्नै नेतृत्वमा सरकार बनाउने तयारीमा छ। यस विषयमा मुख्यमन्त्री यादवसँग छलफल भए पनि सहमति हुन नसकेको नेकपाका एक प्रदेश सांसदले बताए।
हाल नेकपा तीन मन्त्रालयसहित सरकारमा सहभागी छ। गत बिहीबार मुख्यमन्त्री यादवले जनता समाजवादी पार्टी (जसपा) लाई सरकारबाट निकालेर नेकपा एमालेलाई सरकारमा समेटेका थिए। त्यसपछि कांग्रेस, नेकपा एमाले र नेकपाको गठबन्धन बनेको थियो। जनमत पार्टीले समर्थन फिर्ता लिएपछि मुख्यमन्त्री यादवले विश्वासको मत लिनुपरेको थियो।
