खोटाङ जिल्ला प्रशासन कार्यालयले सेवाग्राहीको राहदानी घर-घरमा पुर्याउन जिल्ला हुलाक कार्यालयलाई जिम्मा दिएको छ। यो व्यवस्था नेपाल सरकारको निर्देशनअनुसार सुरु भएको हो।
गत वैशाख १५ गतेपछि आवेदन दिएका १५७ सेवाग्राहीमध्ये ३७ जनाको राहदानी वितरणको जिम्मेवारी हुलाकलाई दिइएको छ। राहदानी शाखा प्रमुख दिनेश आचार्यका अनुसार, विभागबाट छापिएर आएका राहदानी रुजु गरी हुलाकलाई बुझाइन्छ।
सेवाग्राहीले राहदानी घरमै प्राप्त गर्न हुलाक कार्यालयलाई प्रतिव्यक्ति ४५ रुपैयाँ टिकट शुल्क बुझाउनुपर्नेछ। यो रकम राजस्वका रूपमा राज्यकोषमा जम्मा हुनेछ।
जिल्ला हुलाक कार्यालयका सूचना अधिकारी शम्भू तामाङले सोमबार हस्तान्तरण गरिएका राहदानी मंगलबारदेखि वितरण सुरु हुने जानकारी दिए। राहदानी स्थानीय तहमा पठाइएको छ। जनप्रतिनिधिको सहयोगमा सेवाग्राही पहिचान गरी वितरण गरिनेछ।
यसअघि राहदानी लिन आउँदाजाँदा सेवाग्राहीको कम्तीमा दुई हजार रुपैयाँ खर्च हुन्थ्यो। दुर्गम क्षेत्रका सेवाग्राहीले तीन दिनसम्मको समय लगाउनुपर्थ्यो। घरमै राहदानी पुग्ने भएपछि सेवाग्राहीहरूले समय र पैसा दुवै बचत हुने भन्दै खुसी व्यक्त गरेका छन्।
