चालु आर्थिक वर्षको पहिलो १० महिनामा ३१ अर्ब ३१ करोड मूल्य बराबरका सवारीसाधन तथा पार्टपुर्जा आयात भएका छन्। यो अघिल्लो आर्थिक वर्षको सोही अवधिको तुलनामा ९ अर्ब ६५ करोडले बढी हो।
वीरगञ्ज भन्सार कार्यालयका सूचना अधिकारी उदयसिंह विष्टका अनुसार सवारीसाधन र पार्टपुर्जाको आयात बढेसँगै १० महिनाको अवधिमा २० अर्ब ५२ करोड रुपैयाँ राजस्व संकलन भएको छ। गत आर्थिक वर्षको सोही अवधिमा १६ अर्ब ६४ करोड रुपैयाँ राजस्व संकलन भएको थियो।
यस अवधिमा १ अर्ब २५ करोड रुपैयाँ बराबरका सवारीसाधनको आयातबाट ३ अर्ब १७ करोड रुपैयाँ राजस्व संकलन भएको छ।
त्यसैगरी, ७ अर्ब ३२ करोड रुपैयाँ मूल्यका ५१ हजार ४२३ वटा ‘अनएसेम्बल्ड’ मोटरसाइकल आयात भएको छ। यसबाट ७ अर्ब ९ करोड रुपैयाँ राजस्व असुली भएको छ।
