प्रतिनिधिसभा बैठकमा राष्ट्रिय स्वतन्त्र पार्टी (रास्वपा) का सांसद यज्ञमणि न्यौपानेले तत्काल नोटबन्दी गरी कालो धन बैंकिङ प्रणालीमा ल्याउनुपर्ने माग गरेका छन्। भारतमा भएको नोटबन्दीको प्रसंग उल्लेख गर्दै उनले विगत ३५ वर्षदेखि सत्तामा रहेकाहरूले आर्जन गरेको अवैध सम्पत्तिले सरकारविरुद्ध षड्यन्त्र गरिरहेको आरोप लगाए।
न्यौपानेको यस मागमा नेकपाका प्रमुख सचेतक युवराज दुलालले समर्थन जनाएका छन्। उनले यस्तो प्रस्तावमा नेकपाका सबै सांसद हस्ताक्षर गर्न तयार रहेको भन्दै सरकारलाई नोटबन्दी गर्न केले रोकेको प्रश्न गरे।
यसअघि जेन-जी आन्दोलनपछि सुशीला कार्की नेतृत्वको सरकारले राष्ट्र बैंकसँग नोटबन्दीको आवश्यकताबारे सोधेको थियो। राष्ट्र बैंकले बाहिर हल्ला चलेजस्तो नोटकै रूपमा कालोधन बाहिर नरहेको ब्रिफिङ गरेपछि तत्कालीन सरकारले नोटबन्दी आवश्यक नभएको निष्कर्ष निकालेको थियो।
अहिलेको सरकारले पनि नोटबन्दी गर्नुपर्ने अवस्था नरहेको राष्ट्र बैंकका अधिकारीहरू बताउँछन्। यद्यपि, आउँदो स्थानीय चुनाव नजिकिँदै गर्दा नोटबन्दीको सम्भावनालाई सरकारमा रहेका मन्त्रीहरूले भने शून्य नभएको बताएका छन्।
