सुदूरपश्चिम प्रदेशका मुख्यमन्त्री कमलबहादुर शाहको नेतृत्व संकटमा परेको छ। कांग्रेसका बहुमत प्रदेशसभा सदस्यहरूले दलको नेतृत्व परिवर्तनको माग गर्दै हस्ताक्षर बुझाएका छन्।
प्रदेशसभा सदस्य पदमबहादुर शाहीका अनुसार संसदीय दलको सचिवालयमा नेता परिवर्तनको मागसहित निवेदन दर्ता भएको छ। शाहीले कांग्रेस केन्द्रीय नेतृत्वले प्रतिनिधि पठाएर आवश्यक निर्णय लिने विश्वास व्यक्त गरे।
सुदूरपश्चिम प्रदेशसभामा कांग्रेसका १८ सांसद छन्। प्रकाशबहादुर देउवा अमेरिकामा रहेकाले १७ सांसद उपस्थित छन्। तीमध्ये नौ जनाले नेतृत्व परिवर्तनको पक्षमा हस्ताक्षर गरेका छन्।
हस्ताक्षर गर्ने सांसदहरूमा दीवानसिंह विष्ट, मानबहादुर रावल, पदमबहादुर शाही, बेलबहादुर राना, जुना दानी, ललिता सुनार, गीता चौधरी, तुलसी देवकोटा र डम्मरी महरा छन्।
नेतृत्व परिवर्तनको पक्षमा उभिएका अधिकांश सांसद विगतमा शेरबहादुर देउवा समूहमा निकट थिए। अहिले उनीहरू पार्टी सभापति गगनकुमार थापा पक्ष नजिक रहेको बताइन्छ।
