राउटे समुदायलाई कर्णाली सरकारको घुम्ती सेवा: शिक्षा र स्वास्थ्य अब गाउँमै

दक्षिण एसियाकै लोपन्मुख घुमन्ते समुदाय राउटेको जीवनशैलीलाई सम्बोधन गर्दै कर्णाली प्रदेश सरकारले विशेष ‘घुम्ती सेवा’को अवधारणा अघि सारेको छ। ‘राउटे नीति’ अन्तर्गत यो कार्यक्रमले राउटे समुदायलाई उनीहरू जहाँ बसेका छन्, त्यहीँ शिक्षा, स्वास्थ्य र पोषण जस्ता आधारभूत सेवा पुर्‍याउने लक्ष्य राखेको छ। सामाजिक विकासमन्त्री घनश्याम भण्डारीका अनुसार, यो घुम्ती सेवा कार्यनीतिले राउटे समुदाय बसोबास गर्ने स्थानमा आधारभूत शिक्षा प्रदान गर्ने व्यवस्था मिलाउनेछ। विगतमा लेखपढलाई पाप मान्ने समुदायमा पछिल्लो समय केही संस्थाले बालबालिकालाई शिक्षाप्रति अग्रसर गराइरहेका छन्। यस नीतिले यस प्रयासलाई थप बल पुग्ने अपेक्षा गरिएको छ। सरकारले राउटे समुदायको इच्छाअनुसार सुर्खेत, दैलेख, जाजरकोट र सल्यान जस्ता जिल्लामा अस्थायी आवास निर्माण गर्ने नीति पनि लिएको छ। यस कदमले उनीहरूको जीवनशैलीलाई केही हदसम्म स्थायित्व प्रदान गर्ने अपेक्षा गरिएको छ। स्वास्थ्य सेवाको सन्दर्भमा, राउटे समुदायलाई उनीहरू बसोबास गर्ने स्थानमै घुम्ती आधारभूत स्वास्थ्य सेवा प्रदान गरिनेछ। यो सेवा पूर्ण रूपमा निःशुल्क हुनेछ। उनीहरूको स्वास्थ्य समस्या न्यूनीकरण गर्न खानपान, लत्ताकपडा र औषधिको समेत निःशुल्क व्यवस्था गरिने नीतिमा उल्लेख छ।