सिंहदरबारको केन्द्रीय क्यान्टिनमा घुन लागेको चनाको दाल, ओसिएको बदाम र फुटेको अण्डा फेला परेको छ। वाणिज्य, आपूर्ति तथा उपभोक्ता संरक्षण विभागले क्यान्टिन सञ्चालक जि एण्ड बि क्याफे ग्रुपलाई दुई लाख एक हजार रुपैयाँ जरिवाना तोकेको छ।
शुक्रबार विभागले गरेको अनुगमनका क्रममा क्यान्टिनमा घुन लागेको १७ किलो चनाको दाल, ओसिएको ११ किलो नेपाली बदाम र १४ वटा फुटेको अण्डा बरामद भएको थियो। उपभोक्ताको स्वास्थ्यमा खेलबाड हुने गरी राखिएका ती अखाद्य वस्तुहरूलाई विभागको टोलीले नष्ट गरेको छ।
बरामद गरिएका अखाद्य वस्तुको मूल्य छ हजार पाँच सय ६० रुपैयाँ थियो। सिंहदरबारजस्तो संवेदनशील स्थानमा गुणस्तरहीन वस्तुको बिक्रीले सरकारी निकायको अनुगमनमाथि प्रश्न उठाएको छ।
