गृहमन्त्री सुधन गुरुङले मनसुनजन्य विपद् व्यवस्थापनलाई सरकारले उच्च प्राथमिकतामा राखेको बताएका छन्। यस वर्ष विपद्का बेला नागरिकको सुरक्षा र उद्धारलाई केन्द्रमा राखेर काम गरिने उनले बताए।
उनले विगतका सरकारका सकारात्मक कामलाई निरन्तरता दिँदै काम गर्ने बताए। यस वर्ष विपद् व्यवस्थापनमा विशेष ध्यान दिइनेछ।
गृहमन्त्री गुरुङका अनुसार, राइड–सेयरिङ एपको अवधारणामा आधारित विशेष एप विकास गरिएको छ। यो एपले देशभर रहेका डोजर तथा निर्माण उपकरणको वास्तविक समयको स्थान पहिचान गर्न सक्नेछ।
‘कुनै क्षेत्रमा बाढी वा पहिरोका कारण सडक अवरुद्ध भए तत्काल नजिकको डोजर परिचालन गरेर बाटो खुलाउने व्यवस्था मिलाइएको छ,’ उनले भने। यसले विपद्का बेला सडक सञ्जाल खुलाउन सहयोग पुग्नेछ।
यसैबीच, गृहमन्त्री गुरुङले राष्ट्रिय विपद् जोखिम न्यूनीकरण तथा व्यवस्थापन प्राधिकरणमा सुरक्षा निकायका प्रमुखहरूसँगको बैठकमा विपद् व्यवस्थापन र पूर्वतयारीका सम्बन्धमा कडा निर्देशन दिएका छन्।
उनले विगतको कार्यशैलीप्रति असन्तुष्टि व्यक्त गर्दै विपद् आइसकेपछि मात्र उद्धार र राहतमा खटिने प्रवृत्ति सुधार्नुपर्ने बताए। विपद् आउनुपूर्व नै सजग र पूर्वतयारीमा रहनु आवश्यक रहेकोमा उनले जोड दिए।
विगतमा बाढी-पहिरो प्रभावित क्षेत्रको निरीक्षणका नाममा हेलिकप्टरको दुरुपयोग भएको टिप्पणी गर्दै गृहमन्त्री गुरुङले वर्तमान सरकारका कुनै पनि मन्त्रीले अनावश्यक भ्रमण गरेर राज्यको सम्पत्ति नहिनाउन निर्देशन दिए। उनले आफू स्वयं हेलिकप्टर नचढ्ने घोषणा पनि गरे।
उद्धार कार्य र सुरक्षा निकायका कर्मचारीबाहेक अन्य कसैले पनि विपद्को बहानामा हेलिकप्टर चढ्न नपाउने व्यवस्था कडाइका साथ लागू गरिने उनले जानकारी दिए।
देशका उच्च बाढी-पहिरो जोखिमयुक्त क्षेत्रहरूमा पहिल्यैदेखि तयारी अवस्थामा रहन निर्देश दिँदै उनले सबै निकाय एकीकृत टोली बनेर काम गरेमा विपद्मा कसैले पनि ज्यान गुमाउनु नपर्ने विश्वास व्यक्त गरे।
