सम्पत्ति शुद्धीकरण विभागले आर्थिक वर्ष २०८२/८३ मा सातवटा मुद्दामा १२१ जनालाई प्रतिवादी बनाएको छ। विभागले उनीहरू विरुद्ध करिब एक खर्ब १८ अर्ब पाँच करोड रुपैयाँको बिगो दाबी गरेको छ।
विभागमा सम्पत्ति शुद्धीकरण तथा आतङ्कवादी क्रियाकलापमा वित्तीय लगानीसम्बन्धी सूचना दर्ता हुन्छन्। प्राप्त सूचनालाई स्क्रिनिङ कमिटीमा छलफल गरी प्रारम्भिक अनुसन्धान आवश्यक भए अनुसन्धान अधिकृत तोकिन्छ।
यस कार्यका लागि विभागमा चार अनुसन्धान शाखा छन्। कानुन तथा परामर्श इकाई, प्रशासन तथा योजना शाखा, अनुसन्धान समन्वय शाखा र प्रहरी शाखा पनि कार्यरत छन्।
विभागले राजस्व चुहावट, भन्सार, अन्तःशुल्क तथा व्यापारसम्बन्धी मनी लाउन्डरिङ एवं सम्पत्ति शुद्धीकरण कसुरहरूको अनुसन्धान गर्छ। पछिल्लो समय विभागले सम्पत्ति शुद्धीकरणसम्बन्धी अध्ययन तथा अनुसन्धान प्रक्रियालाई तीव्र पारेको छ। अनुसन्धान तथा तहकिकातलाई पनि गति दिइएको छ।
