पोखरामा दुई सातादेखि खाना पकाउने एलपी ग्यासको चरम अभाव छ। उपभोक्ताले एक सिलिन्डर ग्यास पाउन चार घण्टासम्म पालो कुर्नुपरेको छ। ग्यास उद्योगीहरूले आपूर्ति केही घटे पनि तत्काल अभाव हुनुपर्ने कारण नभएको दाबी गरेका छन्।
स्थानीय प्रशासनले ग्यास आपूर्ति सहज बनाउन बाहिरबाट आपूर्ति गर्ने उद्योगीलाई पोखराका लागि सिलिन्डर संख्या बढाउन आग्रह गरेको छ। डिलरहरूले उपभोक्तासम्म ग्यास पुर्याउन प्रहरी परिचालन गरिएको छ। कास्कीका सहायक प्रमुख जिल्ला अधिकारी चित्राङ्गत बरालका अनुसार, डिलरले नियमित ग्राहकलाई मात्र ग्यास दिने गुनासो आएपछि प्रहरी खटाएर पालैपालो वितरणको व्यवस्था मिलाइएको छ।
“सबैलाई बराबरी तरिकाले ग्यास वितरण गर्न प्रहरी परिचालन गरिएको छ। एक सिलिन्डर ग्यास पनि दायाँबायाँ हुँदैन,” बरालले भने।
पोखरामा १७ उद्योगले ग्यास बिक्री गर्छन्। दुईवटा मात्र स्थानीय छन्, बाँकी बाहिरबाट आपूर्ति गर्छन्। सहायक प्रजिअ बरालले अभाव पूरा गर्न आपूर्ति बढाउन सबै कम्पनीका आधिकारिक व्यक्तिलाई फोन गरेर अनुरोध गरेको बताए।
प्रशासनले ग्यास उद्योगी र बिक्रेतालाई प्राप्त र वितरित परिमाणको दैनिक अभिलेख राख्न निर्देशन दिएको छ। पहिले आउने उपभोक्तालाई पहिलो चरणमा बिक्री गर्न र विवरण राख्न भनिएको छ। ७५ वर्षभन्दा बढी उमेरका ज्येष्ठ नागरिक, अशक्त, अपांगता भएका व्यक्ति र भाडामा बस्ने विद्यार्थीलाई प्राथमिकता दिई न्यूनतम परिमाणमा ग्यास वितरण गर्न प्रशासनले भनेको छ। अनावश्यक ग्यास सञ्चित नगर्न अनुरोध गरिएको छ।
उद्योगीहरूले ग्यास आपूर्ति पहिलेको तुलनामा करिब २० प्रतिशतले घटेकोले अभाव देखिएको बताएका छन्। उनीहरूले उपभोक्ताले बढी मात्रामा ग्यास सञ्चित गर्दा पनि अभाव थपिएको आरोप लगाएका छन्।
खाजाघर सञ्चालक राजु भुजेलले ग्यास नपाउँदा व्यवसाय ठप्प हुने अवस्था आएको बताए। उनले केही दिनअघि एक सिलिन्डर ग्यास पाउन चार घण्टा पानीमा भिजेर पालो कुर्नुपरेको दुखेसो पोखे।
एलपी ग्यास बिक्रेता संघ कास्कीका नारायण दाहालका अनुसार, भारतको ग्यास रिफाइनरी सेन्टरमा समस्याले पोखराका लागि आयात घटेको छ। पहुँचयुक्त उपभोक्ताले आवश्यकताभन्दा बढी मौज्दात राख्दा अभाव थपिएको हो। पोखरामा जाडोमा मासिक डेढ लाख र गर्मीमा १ लाख ४० हजार सिलिन्डर ग्यास खपत हुन्छ।
