धनगढीमा धानखेतीका लागि आवश्यक रासायनिक मलको चरम अभाव छ। साउन १ देखि २६ गतेसम्म कृषि सामग्री कम्पनी लिमिटेडको प्रादेशिक कार्यालय धनगढीले बिक्री गरेको मलले किसानको माग धान्न सकेको छैन।
कार्यालयका प्रबन्धक नवलसिंह बोगटीका अनुसार यस अवधिमा एक हजार २८७.७ मेट्रिक टन युरिया, २९५.७ मेट्रिक टन डिएपी र ३३.२५ मेट्रिक टन पोटास बिक्री भएको छ। धानखेतीको मुख्य समयमा सहकारी तथा बिक्री केन्द्रमार्फत मल वितरण गरिए पनि आपूर्ति न्यून छ।
धनगढीका लागि युरिया एक हजार ९४७.७०५ र डिएपी एक हजार ९१५.८१५ मेट्रिक टन आवश्यक कोटा छ। हालको बिक्री र मौज्दात जोड्दा युरिया ७२ प्रतिशत र डिएपी १७ प्रतिशत मात्र पुगेको छ। युरियामा ५४९.७५५ र डिएपीमा एक हजार ५८९.११५ मेट्रिक टनको कमी छ।
डिएपी मलको आपूर्ति कमजोर हुँदा किसानहरूले मल पाउन कठिन भएको गुनासो गरेका छन्। यसले धान उत्पादनमा असर पर्न सक्ने चिन्ता बढेको छ।
