झापा गाउँपालिका–४ स्थित हुलाकी राजमार्गमा शनिबार साँझ बालुवा बोकेको ना५ख ६४९० नम्बरको टिपरले ठक्कर दिँदा साइकलयात्री इशनलाल गणेशको मृत्यु भएको छ। अन्दाजी ६५ वर्षीय गणेशले बाटो काट्दै गर्दा टिपरले ठक्कर दिएको थियो।
दुर्घटनामा गम्भीर घाइते भएका गणेशलाई उपचारका लागि बिर्तामोडस्थित बीएण्डसी अस्पताल लगिएको थियो। उपचारकै क्रममा उनको मृत्यु भएको जिल्ला प्रहरी कार्यालय झापाले जनाएको छ। प्रहरीले टिपर चालक फागुलाल राजवंशीलाई नियन्त्रणमा लिएको छ। अन्दाजी ३६ वर्षीय राजवंशी झापा गाउँपालिका–३ कामटोलीका हुन्।
घटनापछि आक्रोशित स्थानीयले टिपरमा ढुंगा प्रहार गरी तोडफोड गरेका छन्। प्रहरीले घटनाबारे थप अनुसन्धान गरिरहेको छ।
