त्रिभुवन अन्तर्राष्ट्रिय विमानस्थलको एयर ट्राफिक कन्ट्रोल सुधार परियोजनाका लागि जापान सरकारबाट करिब २ अर्ब ७३ करोड रुपैयाँ अनुदान सहायता स्वीकार गर्ने निर्णय मन्त्रिपरिषद्ले गरेको छ। बुधबार बसेको बैठकले यो सहायता स्वीकार गर्ने निर्णय गरेको हो।
सरकारका प्रवक्ता सस्मित पोखरेलले बैठकपछि १० वटा निर्णय सार्वजनिक गरे। यसमा सफ्टवेयर विकास तथा सञ्चालन समिति (गठन) आदेश, २०८३ स्वीकृत गर्ने निर्णय पनि समावेश छ।
गृह मन्त्रालयका सहसचिव नेतृत्वको टोलीले भारतमा हुने सीमा व्यवस्थापनसम्बन्धी १४औं बैठकमा भाग लिनेछ। एसियन डिजास्टर प्रिपर्डनेस सेन्टरको शाखा नेपालमा स्थापना गर्न पनि स्वीकृति दिइएको छ।
परराष्ट्र मन्त्रीको नेतृत्वमा रहेको टोली संयुक्त राष्ट्र संघको ८१औं महासभामा सहभागी हुनेछ। यो महासभा न्यूयोर्कमा आयोजना हुँदैछ।
प्रारम्भिक बालविकास सहजकर्ता, विद्यालय कर्मचारी र विद्यालय सहयोगीको पारिश्रमिक अनुदान मासिक ५,००० रुपैयाँले बढाइनेछ। माध्यमिक तह (कक्षा ९–१०) र आधारभूत तह (कक्षा ६–८) का शिक्षकहरूको तलब क्रमशः माध्यमिक तृतीय र निम्न माध्यमिक तृतीय श्रेणीको सुरु तलब बराबर कायम गरिनेछ।
नेपाल सरकार र साउदी अरेबियाबीच द्विपक्षीय हवाई सेवा सम्झौता गर्न स्वीकृति प्रदान गरिएको छ। भुक्तानी तथा फस्यौंट ऐन, २०७५ संशोधन विधेयक संघीय संसदमा पेश गरिनेछ। नागरिक लगानी कोष ऐन, २०४७ संशोधन विधेयक पनि संसदमा पेश गरिनेछ।
सहसचिव कमलप्रसाद भट्टराई राजपत्राङ्कित विशिष्ट श्रेणीमा बढुवा भएका छन्। उनलाई बागमती प्रदेशको मुख्यमन्त्री तथा मन्त्रिपरिषद् कार्यालयको प्रमुख सचिव पदमा पदस्थापन गरिएको छ।
