कर्णालीका मुख्यमन्त्री मंगलबहादुर शाहीले विश्वासको मत लिएको २२ दिनपछि मन्त्रिपरिषद् विस्तार गरेका छन्। नेकपा (एमाले) तीन मन्त्रालयसहित सरकारमा औपचारिक रूपमा सहभागी भएको छ।
मुख्यमन्त्री शाही र एमाले कर्णाली प्रदेशसभा संसदीय दलका नेता यामलाल कँडेलबीच मन्त्रालय बाँडफाँटमा सहमति जुटेको थियो। सहमतिपछि जुम्लाका टेकराज पछाई आर्थिक मामिला तथा योजनामन्त्री, मुगुका जीतबहादुर मल्ल सामाजिक विकासमन्त्री र हुम्लाका कलबहादुर हमाल जलस्रोत तथा ऊर्जा विकासमन्त्री बनेका छन्।
नवनियुक्त तीनै मन्त्रीलाई प्रदेश प्रमुख यज्ञराज जोशीले पद तथा गोपनीयताको शपथ गराएका छन्। यसअघि सत्ता साझेदार दलहरूबीच मन्त्रालय बाँडफाँटमा सहमति जुट्न नसक्दा मुख्यमन्त्री शाहीले एक्लै सबै मन्त्रालयको जिम्मेवारी सम्हाल्दै आएका थिए।
अब नेपाली कम्युनिस्ट पार्टी (नेकपा) ले तीन मन्त्री पठाउन बाँकी छ।
