भोटेकोसी बाढीपछि खोज तथा उद्धारमा खटिएका सुरक्षाकर्मी र राष्ट्रसेवक कर्मचारीलाई सरकारले जोखिम भत्ता र खाजा खर्च उपलब्ध गराउने निर्णय गरेको छ। बिहीबार बसेको मन्त्रिपरिषद् बैठकले यो निर्णय गरेको हो।
सरकारका प्रवक्ता एवं शिक्षा तथा खेलकुदमन्त्री सस्मित पोखरेलका अनुसार, उद्धारमा खटिने कर्मचारीलाई जोखिम भत्ता र खाजा खर्च दिइनेछ।
उद्धार कार्यका क्रममा घाइते हुने कर्मचारीको निःशुल्क उपचार गरिनेछ। मृत्यु भएमा मृतकका परिवारलाई प्रति मृतक १० लाख रुपैयाँ राहत रकम उपलब्ध गराइनेछ।
बाढीबाट प्रभावित व्यक्ति, उद्योग, व्यापार–व्यवसायलाई तत्काल सञ्चालनमा ल्याउन एकीकृत व्यावसायिक पुनरुत्थान योजनाअन्तर्गत राहत, कर तथा महसुल छुटलगायतका सहुलियत र सुविधा उपलब्ध गराइने निर्णय पनि बैठकले गरेको छ।
