ताजा अपडेट: निलम्बित सशस्त्र प्रहरी एआईजी वंशीराज दाहालसँग जोडिएका बिचौलिया इनम सापकोटा प्रहरी हिरासतमा
संवेदनशील सूचना चुहावटको आरोपमा निलम्बित सशस्त्र प्रहरी बलका अतिरिक्त महानिरीक्षक (एआईजी) वंशीराज दाहालमाथि छानबिन गर्न गृह मन्त्रालयले एआईजी अन्जनीकुमार पोखरेललाई जाँचबुझ अधिकृत तोकेको छ। सशस्त्र प्रहरी प्रधान कार्यालय हल्चोकस्थित मानव स्रोत विभागमा कार्यरत पोखरेललाई सशस्त्र प्रहरी नियमावलीको दफा तोकेरै तीन दिनभित्र प्रतिवेदन बुझाउन निर्देशन दिइएको छ। जाँचबुझ समितिमा पोखरेल मात्रै सदस्य रहेका छन्।
गृह मन्त्रालयले २०८३ असोज १९ गते (सोमबार) दाहाललाई निलम्बन गरेको थियो। गृह मन्त्रालयका प्रवक्ता आनन्द काफ्लेले जारी गरेको विज्ञप्तिमा एआईजी दाहालले निजामती तथा प्रहरी कर्मचारीले पालना गर्नुपर्ने पदीय आचरणविपरीत कार्य गरेको उल्लेख छ। गृहमन्त्री सुधन गुरुङले राज्यको गोपनीयता दुरुपयोग गर्ने जोसुकैलाई कानूनको कठघरामा ल्याइने चेतावनी दिएका छन्।
चोलेन्द्र जबरासँगको भेट र बिचौलिया कनेक्सन
एआईजी वंशीराज दाहालमाथि पूर्वप्रधानन्यायाधीश चोलेन्द्र शमशेर जबरा पक्राउ पर्दा काठमाडौं उपत्यका अपराध अनुसन्धान कार्यालय टेकुमा अनुमति नलिई भेट्न पुगेको आरोप लागेको छ। प्रहरीको विशेष ब्युरोले गरेको अनुसन्धानका क्रममा दाहालको झापाका इनम सापकोटा नाम गरेका बिचौलिया व्यक्तिसँग पनि कनेक्सन देखिएको थियो।
इनम सापकोटामार्फत एआईजी दाहालले पूर्व प्रधानन्यायाधीश जबरालाई संवेदनशील सूचना ‘सेयर’ गरेको अनुसन्धानले देखाएको सशस्त्र प्रहरी बलले जनाएको छ। सशस्त्र प्रहरी बलले दाहालले सुरक्षासँग सम्बन्धित संवेदनशील सूचना चुहावट गरी पदीय आचरणविपरीत कार्य गरेको भन्दै कारबाहीका लागि गृह मन्त्रालयसमक्ष सिफारिस गरेको थियो।
अनिवार्य अवकाशको संघारमा निलम्बन
निलम्बनमा पर्नुअघि एआईजी दाहाल सशस्त्र प्रहरीको सीमा विभाग प्रमुखको रुपमा कार्यरत थिए। सरकारले म्याद थप नगरेको अवस्थामा उनी २०८३ असोज २७ गते राति १२ बजेबाट अनिवार्य अवकाशमा जाँदै थिए।
सशस्त्र प्रहरी नियमावली २०७२ को दफा ६५ को (ग) अनुसार सशस्त्रका एआईजीको पदावधि चार वर्षको हुन्छ। दाहाल २०७९ वैशाख २८ गते एआईजी भएका थिए। सोही नियमावलीको दफा ६५ कै (ग) को (२) उपनियममा सशस्त्र प्रहरी महानिरीक्षक नारायणदत्त पौडेलको सिफारिसमा नेपाल सरकारले एआईजीको पदावधि चार वर्षपछि एक वर्ष थप्न सक्ने व्यवस्था छ।
उक्त उपनियमअनुसार दाहालको एक वर्ष म्याद थपका लागि सशस्त्र प्रहरी हेडक्वाटरले गृहमन्त्रालयमा सिफारिस समेत गरेको थियो। तर, संवेदनशील सूचना चुहावटको आरोपमा निलम्बनमा परेसँगै उनको पदावधि थपको सिफारिस अन्योलमा परेको छ।
जाँचबुझ अधिकृत एआईजी अन्जनीकुमार पोखरेलले तीन दिनभित्र प्रतिवेदन बुझाएपछि सोही अनुसार दाहालमाथि थप कारबाही प्रक्रिया अघि बढ्ने गृह मन्त्रालयले जनाएको छ।
यसअघि: सशस्त्र प्रहरीका एआईजी वंशीराज दाहाल संवेदनशील सूचना चुहावट आरोपमा निलम्बित
