ताजा अपडेट: काठमाडौंमा लुटपाट मच्चाउने ‘माझी गिरोह’का नाइकेसहित तीन पक्राउ
काठमाडौं उपत्यकामा शृङ्खलाबद्ध मोटरसाइकल चोरी र लुटपाटमा संलग्न आयन माझीलाई प्रहरीले गोली हानी नियन्त्रणमा लिएको छ। उनी २७ वटा डाँकाचोरी मुद्दाका प्रतिवादी हुन्।
जिल्ला प्रहरी परिसर काठमाडौंले बिहीबार पत्रकार सम्मेलन गर्दै सिन्धुलीको मरिण गाउँपालिका–५ घर भएका २४ वर्षीय माझीलाई पक्राउ गरिएको जानकारी दिएको हो। माझीलाई नियन्त्रणमा लिने क्रममा प्रहरी टोलीमाथि धारिलो हतियार प्रहारको प्रयास गरी भाग्न खोज्दा २ राउण्ड हवाई फायर र घुँडा मुनी १ राउण्ड गोली प्रहार गरिएको थियो।
माझी समूहका अन्य दुई सदस्य मकवानपुरका ३६ वर्षीय मनोज कुमार मोक्तान र ३४ वर्षीय राकेश थिङलाई भक्तपुरको ठिमी नगरपालिका ४ बाट पक्राउ गरिएको जिल्ला प्रहरी परिसर काठमाडौंका प्रमुख प्रहरी वरिष्ठ उपरीक्षक दिलीप घिमिरेले बताए। यो समूहले आपराधिक गतिविधिमा प्रयोग गर्नका लागि काठमाडौंका विभिन्न स्थानबाट १५ वटाभन्दा बढी मोटरसाइकल चोरी गरेको अनुसन्धानबाट खुलेको छ।
प्रहरीका अनुसार, माझी समूह स्वयम्भू, बौद्ध लगायतका स्थानमा भएका लुटपाट र सिक्री लुटपाटमा प्रत्यक्ष संलग्न रहेको पाइएको छ। आयन माझी २०७७ सालमा डाँका चोरी मुद्दामा तीन महिना कैद बसेर धरौटीमा छुटेपछि सोही मुद्दामा फरार रहेका थिए।
प्रहरीले चाडपर्वका बेला कुनै शंकास्पद वा आपराधिक गतिविधि देखे तत्काल प्रहरीलाई खबर गर्न नागरिकलाई आग्रह गरेको छ। चाडपर्वमा नागरिकको सुरक्षा, सहज आवागमन र दुर्घटना न्यूनीकरणलाई मुख्य लक्ष्य बनाएर प्रहरी परिचालन गरिएको छ।
