काठमाडौं उपत्यकामा लामो समयदेखि श्रृंखलाबद्ध लुटपाटमा संलग्न ‘माझी गिरोह’का मुख्य नाइके आयन माझीसहित तीन जनालाई प्रहरीले पक्राउ गरेको छ। प्रहरीमाथि धारिलो हतियार प्रहार गरी भाग्न खोजेपछि गोली चलाएर माझीलाई नियन्त्रणमा लिएको हो।
जिल्ला प्रहरी परिसर काठमाडौंले बिहीबार पत्रकार सम्मेलन गरी पक्राउ पर्नेमा सिन्धुली मरिण गाउँपालिका–५ घर भई हाल कलंकी बस्ने २४ वर्षीय आयन माझी, मकवानपुरका ३६ वर्षीय मनोजकुमार मोक्तान र ३४ वर्षीय राकेश थिङ रहेको जानकारी दिएको छ। उनीहरूलाई भक्तपुरको ठिमीबाट पक्राउ गरिएको परिसरका प्रमुख, प्रहरी वरिष्ठ उपरीक्षक (एसएसपी) दीलिप घिमिरेले बताए।
यो समूहले काठमाडौं उपत्यकाका विभिन्न स्थानमा बिहान र रातिको समयमा एक्लै हिँड्ने सर्वसाधारणलाई तारो बनाउँदै आएको अनुसन्धानबाट खुलेको छ। उनीहरूले ठेगाना सोध्ने बहानामा महिला तथा पुरुषलाई नियन्त्रणमा लिई सिक्री लुटपाट गर्ने र सवारी साधन परिवर्तन गर्दै फरार हुने शैली अपनाउँथे।
प्रहरीका अनुसार, यो समूह हालसम्म १५ वटाभन्दा बढी मोटरसाइकल चोरी र विभिन्न स्थानमा लुटपाटका २७ भन्दा बढी मुद्दामा संलग्न रहेको पाइएको छ। अभियुक्त माझी यसअघि पनि पटक–पटक डाँका तथा चोरी मुद्दामा कारागार बसेर छुटेका व्यक्ति हुन्।
प्रारम्भिक अनुसन्धानबाट माझीले जेन–जी आन्दोलनका क्रममा लुटिएका अत्याधुनिक हतियार खरिद गर्ने योजनासमेत बनाएको खुलेको छ। प्रहरीले उनीहरूको साथबाट लुटपाटमा प्रयोग गरिएका दुईवटा मोटरसाइकल, पाँचवटा नक्कली नम्बर प्लेट र धारिलो हतियार (खुकुरी) बरामद गरेको छ।
प्रहरीले गिरोहका अन्य सदस्यहरूको खोजी कार्य तीव्र पारेको र पक्राउ परेकाहरूमाथि थप अनुसन्धान भइरहेको जनाएको छ।
यसअघि पनि Nmkhabar ले आयन माझीको पक्राउबारे समाचार प्रकाशित गरेको थियो। विस्तृत जानकारीका लागि २७ मुद्दाका प्रतिवादी आयन माझीलाई प्रहरीले गोली हानी पक्राउ गर्यो शीर्षकको समाचार हेर्न सक्नुहुन्छ।
यसअघि: २७ मुद्दाका प्रतिवादी आयन माझीलाई प्रहरीले गोली हानी पक्राउ गर्यो
