जनकपुरधाममा बिहीबार साँझ छुरा प्रहारबाट एक युवकको मृत्यु भएको छ भने अर्का एक गम्भीर घाइते भएका छन्।
धनुषाको जनकपुरधाम उपमहानगरपालिका–५ रहिमपथ नजिकै साँझ करिब ७:१० बजे सोनारपट्टी दाहाचोकका २४ वर्षीय आमिन साफी र २५ वर्षीय इम्तियाज राइनमाथि छुरा प्रहार भएको थियो। प्रहरीका अनुसार, सोही ठाउँका २२ वर्षीय मोहम्मद इर्साद खानले उनीहरूमाथि छुरा प्रहार गरेका हुन्।
छुरा प्रहारपछि प्रादेशिक अस्पताल जनकपुरमा उपचारका क्रममा आमिन साफीको मृत्यु भएको धनुषा प्रहरीले जनाएको छ। उनको शव अस्पतालको शवगृहमा राखिएको छ।
गम्भीर घाइते भएका इम्तियाज राइनको सोही अस्पतालमा उपचार भइरहेको छ। प्रहरीले छुरा प्रहार गर्ने आरोपित मोहम्मद इर्साद खानलाई नियन्त्रणमा लिएको छ।
प्रारम्भिक अनुसन्धानबाट पुरानो रिसिइबीका कारण इर्सादले दुवै जनाको छाती र पेटमा धारिलो हतियार प्रहार गरेको पाइएको प्रहरीले बताएको छ। प्रहरी टोली घटनास्थल पुगेर थप अनुसन्धान गरिरहेको छ।
यस घटनासँगै मधेश प्रदेशमा बढ्दो आपराधिक गतिविधि नियन्त्रणका लागि चुनौती थपिएको छ। दसैं, तिहार र छठ पर्वलाई लक्षित गर्दै मधेश प्रदेश प्रहरीले असोज २९ गतेदेखि कात्तिक ३० गतेसम्म विशेष सुरक्षा योजना लागू गरेको छ, जसमा धनुषामा मात्र १ हजार ५९९ जना प्रहरी परिचालन गरिनेछ।
