राष्ट्रिय स्वतन्त्र पार्टी (रास्वपा) ले आजदेखि, वैशाख २६ गते, आफ्ना प्रतिनिधि सभा सदस्यहरूका लागि ‘सक्षम सांसद, सशक्त संसद्’ संसदीय अभ्यास तथा नेतृत्व विकास प्रशिक्षण शृङ्खला सुरु गरेको छ। यो दुई दिने कार्यक्रमले बजेट अधिवेशनलाई थप प्रभावकारी बनाउने र सांसदहरूको कानुनी एवं नीतिगत सीप विकास गर्ने लक्ष्य राखेको छ।
पार्टीको केन्द्रीय प्रशिक्षण विभागको आयोजनामा भएको यो प्रशिक्षण कार्यक्रम ललितपुरको जावलाखेलस्थित स्टाफ कलेजमा बिहान ११ बजे पार्टी उपसभापति एवं अर्थमन्त्री डा. स्वर्णिम वाग्लेले औपचारिक रूपमा उद्घाटन गरेका थिए। पार्टीले यस प्रशिक्षणलाई संसद्लाई जनताको पक्षमा थप प्रभावकारी बनाउन र सांसदहरूको कानुनी एवं नीतिगत सीप विकास गर्न कोसेढुंगा सावित हुने अपेक्षा गरेको छ।
प्रशिक्षणको पहिलो दिन सदन र सरकारको अन्तरसम्बन्ध तथा संसदीय प्रक्रियामा केन्द्रित रहेको छ। यसअन्तर्गत महामन्त्री भूपदेव शाहले पार्टी, सरकार र सदनबीचको समन्वयकारी सम्बन्धका बारेमा प्रशिक्षण दिने कार्यक्रम छ। त्यसैगरी, संसदीय दलका उपनेता गणेश पराजुलीले संसदीय समितिहरूमा सांसदहरूले खेल्नुपर्ने सक्रिय भूमिकाका विषयमा आफ्नो अनुभव प्रस्तुत गर्नेछन् भने सचेतक निशा डाँगीले संसदीय अभ्यास एवं दलीय समन्वयमा सचेतकको भूमिकाबारे विधिहरू प्रस्तुत गर्नेछिन्।
प्रशिक्षणको दोस्रो दिन विशेषगरी राजनीतिक आचरण, कूटनीति र आगामी निर्वाचनको तयारीमा केन्द्रित हुनेछ। सचेतक क्रान्तिशिखा धितालले राजनीतिक मनोविज्ञान, व्यवहार र उच्च नैतिक आचरणका बारेमा प्रशिक्षण दिनेछिन्। परराष्ट्र मन्त्री शिशिर खनालले अन्तर्राष्ट्रिय कूटनीतिक सम्बन्ध र राजकीय मर्यादाका प्राविधिक पक्षहरूबारे जानकारी गराउनेछन्। सहमहामन्त्री विपिनकुमार आचार्यले आगामी स्थानीय निर्वाचनका लागि उम्मेदवार छनोटको वैज्ञानिक रूपरेखा र पार्टीको आन्तरिक तयारीबारे कार्यपत्र प्रस्तुत गर्नेछन्।
रास्वपाका १८२ सांसदलाई क्षमता विकासको आवश्यकता
गत फागुनमा भएको निर्वाचनमा रास्वपाले १८२ सिट जितेको थियो। अधिकांश प्रतिनिधि राजनीतिक, संवैधानिक र कानुनी जानकार नभएकाले यस्ता प्रशिक्षण प्रभावकारी हुने रास्वपाले विश्वास लिएको छ। यसअघि रातोपाटीले चैत ३ र ४ गते ललितपुरस्थित ग्वार्कोमा रास्वपाले जनप्रतिनिधिलाई आवासीय प्रशिक्षण कार्यक्रम राखेको जानकारी दिएको थियो।
यस दुई दिने सघन प्रशिक्षणले रास्वपाका सांसदहरूलाई संसदीय मर्यादा कायम राख्दै जनसरोकारका मुद्दाहरूमा सदनमा अझ सशक्त र प्रखर रूपमा प्रस्तुत हुन आवश्यक ऊर्जा र ज्ञान प्रदान गर्ने विश्वास लिइएको छ।
प्रशिक्षण कार्यक्रमको समापन सत्रमा पार्टी सभापति रबि लामिछानेले विशेष निर्देशनात्मक मन्तव्य राख्नेछन्। सभापति लामिछानेले पार्टीको मूल एजेन्डा, सुशासनप्रतिको प्रतिबद्धता र जनउत्तरदायी सांसदको रूपमा निर्वाह गर्नुपर्ने जिम्मेवारीबारे मार्गनिर्देशन गर्नेछन्।
