ताजा अपडेट: एयर इन्डियाको विमान अपहरणको आशंकामा जयपुर डाइभर्ट: ३०६ यात्रु सुरक्षित
जर्मनीको फ्र्याङ्कफर्टबाट भारतको नयाँदिल्ली आउँदै गरेको एयर इन्डियाको उडान नम्बर एआई२०३० लाई बमको धम्की आएपछि बुधबार राजस्थानको जयपुर विमानस्थलमा आपत्कालीन अवतरण गराइएको छ। बोइङ ७८७–९ विमानमा अपहरणको आशंकासमेत उत्पन्न भएपछि सुरक्षा निकायले तत्काल सक्रियता बढाएका थिए।
प्रारम्भिक विवरणअनुसार विमानका पाइलटले बिहान ९ बजेर ५ मिनेटतिर आपत्कालीन संकेत दिएका थिए। विमान मुम्बई फ्लाइट इन्फर्मेसन रिजन (एफआईआर) मा रहेका बेला पाइलटले ‘स्क्वाक कोड ७५००’ सक्रिय गरेका थिए। यो कोड विमानमा अपहरण वा गैरकानुनी हस्तक्षेप भएको संकेत गर्न प्रयोग गरिन्छ।
विमान जयपुरमा अवतरण गरेपछि त्यसलाई अन्य विमानबाट अलग राखिने आइसोलेसन क्षेत्रमा लगिएको थियो। घटनापछि जयपुर विमानस्थलमा सुरक्षा सतर्कता बढाइएको थियो। प्रहरीको बम निरोधक टोली, अग्नि नियन्त्रक र अन्य सुरक्षा टोली विमानस्थल पुगेका थिए। राजस्थान प्रहरीका वरिष्ठ अधिकारीहरूले समेत घटनास्थलको अवस्थाबारे जानकारी लिएका थिए।
बमको धम्की र अपहरणको अफवाह
मालवीय नगरका सहायक प्रहरी आयुक्त शिव दयालले समाचार संस्था पीटीआईलाई विमानमा बमको धम्की आएपछि आपत्कालीन अवतरण गराइएको जानकारी दिए। प्रारम्भिक सूचनामा विमान अपहरण भएको आशंका गरिए पनि सुरक्षा निकायको जाँचपछि उक्त आशंका अफवाह साबित भएको भारतीय सञ्चारमाध्यमले उल्लेख गरेका छन्।
सबै यात्रु र चालक दलका सदस्यहरूलाई सुरक्षित रूपमा विमानबाट बाहिर निकालिएको थियो। उनीहरूलाई एयरपोर्ट टर्मिनलको तोकिएको होल्डिङ क्षेत्रमा लगिएको थियो।
अनुसन्धान जारी, प्रतिक्रिया प्रतीक्षारत
विमानमा बमको धम्की कसरी आयो र स्क्वाक कोड ७५०० सक्रिय हुनुको वास्तविक कारण के थियो भन्नेबारे विस्तृत आधिकारिक विवरण सार्वजनिक भइसकेको छैन। सुरक्षाकर्मीहरूले विमानको सघन जाँच गरिरहेका छन्। एयर इन्डियाको आधिकारिक प्रतिक्रियासमेत प्रतीक्षारत छ।
