अरनिको राजमार्ग स्तरोन्नति: ‘बिटुमिन’ अभावले दुई महिनादेखि काम ठप्प
काभ्रेपलाञ्चोक । अरनिको राजमार्गअन्तर्गत धुलिखेल–खावा सडकखण्डको स्तरोन्नतिको काम ‘बिटुमिन’ (कालोपत्रेका लागि आवश्यक कच्चा पदार्थ) को अभावमा दुई महिनादेखि ठप्प छ। यसले गर्दा सडकको स्तरोन्नति कार्य प्रभावित भएको छ।
डिभिजन सडक कार्यालय भक्तपुरका अनुसार गत चैतमा रातको समयमा आवागमन बन्द गरी र दिउँसो एकतर्फी सञ्चालन गरेर कालोपत्र (डिबिएम–पिच) को काम गरिएको थियो। तर, वैशाखदेखि ‘बिटुमिन’ अभाव भएपछि सम्पूर्ण काम रोकिएको हो।
कार्यालयका प्रमुख सिनियर डिभिजनल इन्जिनियर सुमन योगेशका अनुसार स्तरोन्नति भइरहेको चार किलोमिटर सडकखण्डमध्ये करिब दुई दशमलव पाँच किलोमिटर सडक दुवैतर्फी पहिलो चरणमा पक्की गरिएको छ। बाँकी एक दशमलव पाँच किलोमिटर सडकको पक्की गर्ने कार्य र पहिलो चरणमा कालोपत्रे गरिएका सडकमा ‘आस्फाल’ थप्ने काम पनि रोकिएको छ।
योगेशले कच्चा पदार्थको अभावका कारण वैशाख पहिलो सातादेखि सुरु गर्ने भनिएको बाँकी काम रोकिएको बताए। हाल यात्रालाई सहज बनाउन ग्राभेलमाथि खाल्डाखुल्डी पुर्ने काम भने भइरहेको छ।
उक्त सडकखण्डको बाँकी दूरीमा बिटुमिन आयात भएपछि दोस्रो चरणमा कालोपत्रे गरिनेछ। यसमा ग्राभेलमाथि २० सेन्टिमिटर बाक्लो सिमेन्ट मिसाइएको बेस हाल्ने र दुई चरणको कालोपत्रे (डिबिएम र आस्फाल) गर्ने योजना छ।
यसअघि निर्माण व्यवसायीको लापर्वाहीका कारण रोकिएको स्तरोन्नति कार्यलाई तीव्रता दिन गत कात्तिकमा नयाँ निर्माण कम्पनीसँग ठेक्का सम्झौता गरिएको थियो। सी–एन ए–वान काली जेभीसँग भ्याटबाहेक रु ३१ करोड ५६ लाखमा पुस महिनाभित्र काम सम्पन्न गर्ने गरी ठेक्का सम्झौता भएको थियो।
कार्यालयले यसअघि तोकिएको समयमा निर्माण सम्पन्न नगरेको भन्दै गौरी–पार्वती निर्माण सेवा कम्पनीसँगको ठेक्का २०८१ फागुन १५ गते रद्द गरेको थियो। उक्त कम्पनीले २०८० चैत १९ गतेभित्र सडक निर्माण सम्पन्न गर्ने गरी २०७९ जेठ २० मा ठेक्का लिएको थियो।
अरनिको राजमार्ग हुँदै चीनको तातोपानी नाका तथा सिन्धुपाल्चोक, दोलखा, रामेछाप लगायतका जिल्ला जाने मुख्य सडक भएकाले यसको स्तरोन्नतिले यातायातलाई सहज बनाउने अपेक्षा गरिएको छ।
बिटुमिन आयात भएपछि दोस्रो चरणको कालोपत्रे सुरु हुने
डिभिजन सडक कार्यालय भक्तपुरका प्रमुख सिनियर डिभिजनल इन्जिनियर सुमन योगेशका अनुसार, ‘बिटुमिन’को आपूर्ति सहज हुनेबित्तिकै बाँकी रहेको एक दशमलव पाँच किलोमिटर सडकखण्डको दोस्रो चरणको कालोपत्रेको काम सुरु गरिनेछ। यो काममा ग्राभेलमाथि २० सेन्टिमिटर बाक्लो सिमेन्ट मिसाइएको बेस हाल्ने र त्यसपछि दुई चरणको कालोपत्रे (डिबिएम र आस्फाल) गर्ने योजना छ।
