महोत्तरीको औरही नगरपालिकामा चापाकल खरिदमा अनियमितता गरी ११ जनाविरुद्ध अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको छ। आर्थिक वर्ष २०७९/८० मा ह्याण्डपम्प तथा ट्युबवेल खरिद गर्दा सार्वजनिक खरिद ऐनविपरीत लागत अनुमान तयार गरियो। खरिद प्रक्रियालाई विभाजन गरी प्रतिस्पर्धा सीमित पारिएको थियो। आपूर्तिकर्तासँग मिलेमतोमा भुक्तानी दिइएको आयोगको आरोप छ।
तत्कालीन निमित्त प्रमुख प्रशासकीय अधिकृत नीलाम्बर मिश्र मैथली र लेखापाल विजयकुमार यादवविरुद्ध जनही ३६ लाख १३ हजार ३१ रुपैयाँ बिगो मागदाबी छ। इन्जिनियर सन्तोषकुमार यादव र सब–इन्जिनियर विपिनकुमार मण्डलविरुद्ध जनही २० लाख ४९ हजार ४५० रुपैयाँ बिगो कायम गरिएको छ। जिन्सी शाखा प्रमुख शिवशङ्कर यादवविरुद्ध १५ लाख ६३ हजार ५८१ रुपैयाँ बिगो मागदाबी छ। योजना शाखा प्रमुख गङ्गाराम यादवविरुद्ध पनि ३६ लाख १३ हजार ३१ रुपैयाँ बिगो कायम छ।
आयोगले आपूर्तिकर्ता लीला आयरन स्टोर्सका प्रोप्राइटर विनयकुमार यादवविरुद्ध पाँच लाख ३४ हजार ८७६ रुपैयाँ बिगो मागदाबी गरेको छ। डिएम जेनरल अर्डर सप्लायर्सका प्रोप्राइटर दूधनाथ कुमरविरुद्ध ११ लाख ८९ हजार ४७१ रुपैयाँ बिगो छ। श्रीराम इन्टरप्राइजेजका प्रोप्राइटर अमरनाथ कुमरविरुद्ध दुई लाख २० हजार १९७ रुपैयाँ बिगो छ। जैसवाल निर्माण सेवा (सिर्जना ट्रेडर्स)का प्रोप्राइटर रामबाबु चौधरीविरुद्ध सात लाख नौ हजार ६२३ रुपैयाँ बिगो छ। क्वालिटी सोलुसन कम्पनी प्रालिका प्रबन्ध निर्देशक मनोजकुमार यादवविरुद्ध सात लाख ११ हजार ९०० रुपैयाँ बिगो कायम छ।
राष्ट्रसेवक कर्मचारीविरुद्ध भ्रष्टाचार निवारण ऐन, २०५९ को दफा १७ बमोजिम मुद्दा दायर भएको छ। आपूर्तिकर्ताविरुद्ध सोही ऐनको दफा २२ बमोजिम मतियारका रूपमा कसुर गरेको आरोप छ। आयोगले जरिवाना, कैद तथा बिगो असुलउपरको मागदाबी गरेको छ।
