बडीकेदार गाउँपालिकामा एक्स्काभेटर भाडामा ४७ लाख हिनामिना: ८ जनाविरुद्ध मुद्दा

डोटीको बडीकेदार गाउँपालिकामा एक्स्काभेटर भाडा ठेक्कामा करिब ४६ लाख ९५ हजार रुपैयाँ हिनामिना भएको आरोपमा तत्कालीन अध्यक्ष, उपाध्यक्ष, कर्मचारी तथा ठेकेदारसहित ८ जनाविरुद्ध विशेष अदालत, काठमाडौँमा आरोपपत्र दायर भएको छ। अख्तियार दुरुपयोग अनुसन्धान आयोगले आ.व. २०७७/७८ को ठेक्का नं. ०२ र ०७७/०७८ मा कार्यपालिका बैठकबाट न्यूनतम भाडा दरभन्दा कममा मासिक ४ लाख ५० हजार रुपैयाँमा एक्स्काभेटर भाडामा दिने निर्णयलाई अनियमित ठहर गरेको छ। सूचना प्रकाशनमा प्रक्रिया उल्लङ्घन गरी तीनवटा फर्म मात्र सहभागी गराइएको थियो। गलत सिफारिसका आधारमा भागरथी निर्माण सेवासँग सम्झौता भएको थियो। सम्झौता अनुसार कार्यसम्पादन जमानत बिना नै एक्स्काभेटर प्रयोग गर्न दिइएको थियो। करिब ८४० घण्टा प्रयोगबाट प्राप्त हुनुपर्ने करिब ४६ लाख ९५ हजार रुपैयाँ गाउँपालिकामा दाखिला नगरी हिनामिना गरिएको आरोपपत्रमा उल्लेख छ। प्रतिवादीमा तत्कालीन अध्यक्ष कृष्ण बहादुर चन्द, उपाध्यक्ष इन्द्रा कुमारी बोहरा, निमित्त प्रमुख प्रशासकीय अधिकृत दिपक राज जैशी, सब–इन्जिनियर दान बहादुर पछेरा, लेखापाल युवराज भट्ट, भागरथी निर्माण सेवा र सञ्चालक पशुपति जोशी तथा केशव बहादुर बमसमेत छन्।