बागमती प्रदेशसभाले प्रदेश विनियोजन विधेयक २०८३ र प्रदेश आर्थिक विधेयक २०८३ लाई बहुमतले पारित गरेको छ।
मन्त्री प्रभात तामाङले प्रदेश विनियोजन विधेयक २०८३ पारित गर्न प्रस्ताव पेस गरे। उनले प्रदेश आर्थिक विधेयक २०८३ माथि सैद्धान्तिक छलफलका लागि प्रस्ताव पनि राखे।
प्रदेशसभा सदस्य ईश्वर सापकोटा, श्रृजना सैजु र रत्नप्रसाद ढकालले आर्थिक वर्ष २०८३/८४ को बजेटमा खर्च कटौतीको प्रस्ताव ल्याए। उक्त प्रस्ताव बहुमतले अस्वीकृत भयो।
छलफलमा सदस्य सैजु, ढकाल र नुरज बज्राचार्यले यातायात क्षेत्रमा करको भार बढ्ने बताए। उनीहरूले लाइसेन्स नवीकरण लगायतका सेवाको प्रक्रिया संशोधन गर्न सुझाव दिए।
मन्त्री तामाङले राज्य सञ्चालनका लागि कानुनसम्मत करको दायरा हेरफेर गर्न सकिने बताए। उनले नागरिकलाई सेवा विस्तारमा थप सुविधा दिने प्रतिबद्धता जनाए। मुख्यमन्त्री इन्द्रबहादुर बानियाँसहित अन्य मन्त्रीहरूले पनि मन्त्रालयगत प्रश्नहरूको जवाफ दिए।
प्रदेशसभाका उपसभामुख अप्सरा चापागाईंले सूचना जारी नभएसम्मका लागि बैठक स्थगित गरेकी छिन्।
