बागमती प्रदेशमा चालु आर्थिक वर्षको वैशाख मसान्तसम्म उपत्यका बाहेकका १० जिल्लामा १,६५८ सवारी दुर्घटना भएका छन्। यस अवधिमा २८१ जनाको मृत्यु भएको छ भने ३,२९६ जना घाइते भएका छन्।
प्रदेश प्रहरी कार्यालय, हेटौंडाका अनुसार गत आर्थिक वर्ष २०८१/०८२ मा यी दश जिल्लामा २,४२२ सवारी दुर्घटनामा ३०४ जनाको मृत्यु भएको थियो। आर्थिक वर्ष २०८०/०८१ मा १,५३६ दुर्घटनामा ३१५ जनाले ज्यान गुमाएका थिए। गत वर्षको तुलनामा अघिल्लो वर्ष मृतक संख्या ११ ले कम थियो।
गत आर्थिक वर्षमा अघिल्लो वर्षको तुलनामा ८३६ घटना बढी भएका छन्। चालु आर्थिक वर्षको वैशाख मसान्तसम्म १,६५८ सवारी दुर्घटना भएका छन्।
दुर्घटनाको तथ्यांकमा चितवन जिल्ला अगाडि छ। गत आर्थिक वर्षमा चितवनमा मात्रै १२० जनाले ज्यान गुमाएका थिए। यसवर्ष यो अवधिमा ८९ जनाको मृत्यु भएको छ। दश महिनामा चितवनमा ४८४ सवारी दुर्घटना भएका छन्। ८७ जना गम्भीर घाइते छन् भने ८०९ जना सामान्य घाइते भएका छन्।
दुर्घटनामा ज्यान गुमाउनेको संख्या चितवनपछि मकवानपुरमा धेरै छ। गत आवमा मकवानपुरमा ४०७ दुर्घटनामा ५० जनाले ज्यान गुमाएका थिए। यसवर्ष मकवानपुरमा ५३ जनाको मृत्यु भएको छ।
प्रदेश प्रहरी कार्यालय हेटौडाका प्रमुख प्रहरी नायब महानिरीक्षक दिपक रेग्मीले सडकको दुरावस्था, चालकको लापरबाही, सवारी साधनको चाप र जोखिमयुक्त सडक मार्गका कारण दुर्घटना बढेको बताए।
