बाजुराको हिमाली गाउँपालिका-३, लाम्पाटामा सीमा विवादले उग्र रूप लिएपछि प्रहरीसहित पाँचजना घाइते भएका छन्। हुम्लाको खार्पुनाथ गाउँपालिका-२, थालीका स्थानीयले प्रहरी चौकी निर्माणको विरोध गर्दा झडप भएको हो।
जिल्ला प्रहरी कार्यालय बाजुराका प्रहरी निरीक्षक नरेशबहादुर शाहीका अनुसार घाइते हुनेमा हिमाली गाउँपालिका-३ का वडासदस्य पेमा गारा गुरुङ, उनकी श्रीमती लक्ष्मी गुरुङ, मिनु कुँवर, प्रहरी सहायक हवल्दार महेश धामी र कार्यकारी प्रमुख कुलबहादुर थापा छन्। उनीहरूको ढाड, गर्धन, छाती तथा खुट्टामा चोट लागेको छ।
शैपाल हिमाल बेस क्याम्पतर्फ गइरहेको धनगढी उपमहानगरपालिकाका मेयर गोपाल हमाल नेतृत्वको टोली घटनास्थल पुगेपछि तनाव बढेको थियो। टोलीले ड्रोनमार्फत भिडियो खिच्दा थाली गाउँका स्थानीय आक्रोशित बनेका थिए।
सञ्चार सम्पर्क नहुँदा मेयर हमालको टोलीको अवस्था अज्ञात छ। सुदूरपश्चिम प्रदेश सरकारले लाम्पाटामा प्रहरी चौकी भवन निर्माणका लागि ४० लाख रुपैयाँ विनियोजन गरेको छ। थालीका स्थानीयले उक्त क्षेत्र आफूहरूको भोगचलनमा रहेको दाबी गर्दै चौकी निर्माणको विरोध गरेका छन्।
