बंगलादेश सरकारले उत्तरी नेपालमा आएको विनाशकारी बाढी तथा पहिरोबाट प्रभावित नागरिकको उद्धार, राहत र पुनःस्थापनाका लागि १ मिलियन अमेरिकी डलर (करिब १५ करोड २० लाख रुपैयाँ) सहयोग गर्ने भएको छ। बंगलादेशका प्रधानमन्त्री तारिक रहमानको पत्रसहित राज्य विदेशमन्त्री हुमायुन कबिरले नेपाली राजदूत घनश्याम भण्डारीलाई सहयोगबारे जानकारी गराएका हुन्। सहयोग रकम प्रधानमन्त्री दैवी प्रकोप उद्धार कोषमा जम्मा गरिनेछ। यसअघि बंगलादेशको संसद्ले अगस्ट २७ मा विपद्प्रति दुःख व्यक्त गर्दै शोक प्रस्ताव पारित गरेको थियो। बंगलादेशका विदेशमन्त्री खलिलुर रहमानले नेपाली समकक्षी शिशिर खनालसँग टेलिफोन वार्ता गरी आवश्यक सहयोग गर्ने प्रतिबद्धता जनाएका थिए। दूतावासले यो सहयोगले दुई देशबीचको मित्रता मजबुत हुने विश्वास व्यक्त गरेको छ।
यसैबीच, संयुक्त राष्ट्रसङ्घले भोटेकोशी बाढीपीडितको उद्धार, राहत र पुनःस्थापनाका लागि चार करोड ९६ लाख अमेरिकी डलर सहयोग गर्ने जनाएको छ। राष्ट्रसङ्घले मानवीय सहायता साझेदार निकायसँग विपद् राहतका लागि रकम अपिल गरेको हो। भोटेकोशी तथा त्रिशूली नदीको बाढीबाट प्रभावित ८४ हजारभन्दा बढी नागरिकलाई जीवनरक्षक सहायता पुर्याउन राष्ट्रसङ्घले अपिल गरेको छ। यो रकम राष्ट्रिय विपद् जोखिम न्यूनीकरण तथा व्यवस्थापन प्राधिकरणको नेतृत्वमा सरकारले तयार पारेको हिउँदपूर्वको चार महिने योजनालाई सम्बोधन गर्नेछ।
यस योजनाअन्तर्गत विस्थापित परिवारलाई जाडोबाट बचाउन अस्थायी आवास सामग्री वितरण गरिनेछ। विद्युत् नपुगेका ठाउँमा सौर्य उपकरण उपलब्ध गराइनेछ। क्षतिग्रस्त खानेपानी प्रणालीको मर्मत, पानी शुद्धीकरण र सरसफाइ सामग्री वितरणले पानीजन्य रोगको फैलावट रोक्ने अपेक्षा छ। घुम्ती स्वास्थ्य शिविरमार्फत उपचार र पोषण सहयोग उपलब्ध गराइनेछ। परिवारबाट छुट्टिएका बालबालिकालाई पुनर्मिलन गराइनेछ। आकस्मिक खाद्य सहायता र पशुधन व्यवस्थापनले ग्रामीण जीविकोपार्जन जोगाउनेछ।
यता, विभिन्न कम्पनी तथा कर्मचारीहरूले १ लाख ५० हजार रुपैयाँ सहयोग गरेका छन्। प्रधानमन्त्री दैवी प्रकोप उद्धार कोषमा जम्मा गर्ने उद्देश्यले सञ्चालित अभियानमा कर्मचारीबाट प्रतिव्यक्ति १ हजार रुपैयाँ संकलन गरिएको थियो।
