भोटेकोशी नदी थुनिएर बनेको तालको पानी बढेको छ। ताल फुट्ने जोखिम देखिएपछि तल्लो तटीय क्षेत्रमा उच्च सतर्कता अपनाउन आग्रह गरिएको छ। बाढी पूर्वानुमान महाशाखाले शुक्रबार बिहान सूचना जारी गर्यो।
चीन सरकारबाट प्राप्त सूचना, भू-उपग्रह तस्बिर र विश्लेषणले नदी थुनिएर ताल बनेको देखाएको छ। ताल बढ्ने क्रममा रहेकाले फुट्ने जोखिम बढेको महाशाखाले जनाएको छ।
भोटेकोशी र त्रिशुली नदीको बहाव सतर्कता तहभन्दा तल छ। सम्भावित जोखिमलाई ध्यानमा राखी महाशाखाले उच्च सतर्कता अपनाउन भनेको छ। तल्लो तटीय क्षेत्रका बासिन्दा, यात्रु र उद्धारकर्ताहरूलाई नदी किनार र जोखिमयुक्त क्षेत्रबाट सुरक्षित स्थानमा रहन अनुरोध गरिएको छ।
धादिङमा त्रिशूली नदीमा पुनः बाढी आउन सक्ने सूचनापछि उच्च सतर्कता अपनाइएको छ। जिल्ला प्रशासन कार्यालय धादिङले आपत्कालीन बैठक बसी जोखिमबारे छलफल गर्यो। प्रशासनले नदीको जलसतह बढेमा तत्काल सुरक्षित स्थानमा सर्न आग्रह गरेको छ।
रुबीभ्याली गाउँपालिकाका १५ जना स्थानीय बाढीपछि अझै सम्पर्कविहीन छन्। उनीहरू रोजगारी, व्यापार वा पारिवारिक भेटघाटका लागि रसुवा पुगेका थिए।
