भोटेकोशी नदीको विनाशकारी बाढीले सुरुङमा फसाएका नागरिकको उद्धार र क्षतविक्षत शव पहिचान गर्न भारत, चीन, दक्षिण कोरिया र सिङ्गापुरका विशेषज्ञ टोली खटिएका छन्। परराष्ट्र मन्त्रालयका अनुसार विपद्मा ज्यान गुमाउनेको संख्या बढ्दो छ।
हालसम्म १ हजार २०४ शव फेला परेका छन्। करिब ४ हजार २०० जना अझै बेपत्ता छन्। बेपत्ता हुनेमा ३४ देशका ५९० विदेशी नागरिक छन्। १२ हजार १०० जनाको सकुशल उद्धार गरिएको छ। उद्धार गरिएकामा ३०० भन्दाबढी विदेशी नागरिक छन्।
भारतीय, चिनियाँ र कोरियाली टोली जलविद्युत् आयोजनाका सुरुङमा फसेकाको उद्धारमा जुटेका छन्। भारतीय टोली लाङ्टाङ र चिलिमेमा काम गरिरहेको छ। सुरुङभित्र हिलो र ठूला ढुङ्गाले उद्धारमा बाधा पुर्याइरहेको छ।
चिनियाँ टोली अपर त्रिशूली ३ ‘ए’ मा परिचालन गरिएको छ। कोरियाली टोली अपर त्रिशूली १ को सुरुङमा कार्यरत छ।
शव पहिचानका लागि १९ सदस्यीय भारतीय फरेन्सिक टोली नेपाल प्रहरीसँग काम गरिरहेको छ। चीनको ५ सदस्यीय टोलीले डीएनए विश्लेषण तीव्र पारेको छ। सिङ्गापुरबाट ६ सदस्यीय ‘डिजास्टर भिक्टिम आइडेन्टिफिकेसन टिम’ आइसकेको छ। थप १३ सदस्य ड्रोन र डीएनए परीक्षण उपकरणसहित आउँदैछन्। कोरियाली फरेन्सिक टोली पनि खटिएको छ।
कैलाश पर्वत जाने क्रममा अलपत्र परेका ४ हजार तीर्थयात्रीमध्ये २ हजार ५०० जना फर्किसकेका छन्। बाँकीलाई ल्हासाबाट हवाईमार्ग हुँदै फर्काउन सहजीकरण भइरहेको छ। चीनको केरुङमा १ हजार ५०० नेपाली नागरिक अलपत्र छन्। १७६ नेपाली ट्रक र कन्टेनरलाई सुरक्षित नाकाबाट फर्काउन रुट परिवर्तनको पहल भइरहेको छ।
