धनुषाको विदेह नगरपालिकामा श्री शंकर जनता उच्च माध्यमिक विद्यालयको स्वामित्वमा रहेका १० वटा पोखरीको आम्दानीमा २२ लाख रुपैयाँ हिनामिना भएको गम्भीर आरोप लागेको छ। सरोकारवालाहरूले यो आर्थिक अनियमितताको विषय बाहिर ल्याउँदै ‘भण्डाफोर’ गरेका छन्।
सार्वजनिक भएको एक लिखित पत्र (मिति २०८३/६/११) अनुसार, उक्त पोखरीहरूबाट प्राप्त आम्दानी बिना ठेक्कापट्टा हिनामिना गरिएको दाबी गरिएको छ। पत्रमा विदेह नगरपालिकाका मेयर बेचन दास, वडा अध्यक्ष राम श्रेष्ठ मुखिया र विद्यालयका प्रधानाध्यापकको प्रत्यक्ष मिलेमतोमा यो रकम हिनामिना भइरहेको उल्लेख छ।
सञ्जीव झाको नामबाट सार्वजनिक भएको अपिलमा भनिएको छ, “विना ठेक्कापट्टा लगाई वडा अध्यक्ष, हेड मास्टर र मेयर तिनै जना मिली अहिलेसम्म त्यो रकम हिनामिना भइरहेको हुनाले सबै जनाको ध्यान जावोस्, सम्बन्धित निकायको पनि ध्यान जावोस्।”
शिक्षाजस्तो पवित्र क्षेत्रसँग जोडिएको विद्यालयको सम्पत्तिमाथि जनप्रतिनिधिहरूबाटै यस्तो कार्य हुनु अत्यन्तै निन्दनीय छ। स्थानीयले यस विषयमा अख्तियार दुरुपयोग अनुसन्धान आयोग र सम्बन्धित निकायले तत्काल छानबिन गरी दोषीउपर कडा कारबाही गर्नुपर्ने माग गरेका छन्। (NmKhabar को तर्फबाट खबरदारी)
