नक्कली कागजात प्रयोगको आरोपमा बिरगंज महानगरपालिकाका मेयर राजेशमान सिंह थोरिबाट पक्राउ परेका छन्। जिल्ला अदालत पर्साले १० दिनअघि पक्राउ पुर्जी जारी गरेको थियो।
जिल्ला प्रहरी कार्यालय, पर्साका प्रवक्ता प्रहरी नायब उपरीक्षक (डीएसपी) राजु कार्कीले सिंहलाई थोरिबाट नियन्त्रणमा लिएको पुष्टि गरे। ‘विशेष टोली परिचालन गरेर उनलाई खोजी गरिएको थियो। आजै अदालतमा पेस गरिनेछ,’ कार्कीले भने।
मेयर सिंहमाथि जन्मदर्ता, नागरिकता र राहदानीमा नक्कली हस्ताक्षर गरी एक किशोरीलाई प्रयोग गराएको आरोप छ। गत वैशाख २२ गते जिल्ला अदालत पर्साले लियाकत अलिले दिएको उजुरीका आधारमा सिंहसहित तीन जनालाई पक्राउ गर्न प्रहरीलाई आदेश दिएको थियो।
