चालु आर्थिक वर्षको ११ महिनामा सरकारको पुँजीगत खर्च ३२.५३ प्रतिशतमा सीमित भएको छ। यस अवधिमा पूर्वाधार तथा विकास निर्माणका लागि छुट्याइएको रकममध्ये एक खर्ब ३२ अर्ब ६६ करोड ७७ लाख रुपैयाँ मात्र खर्च भएको महालेखा नियन्त्रक कार्यालयको तथ्यांकले देखाएको छ।
सरकारले चालु आर्थिक वर्षका लागि कुल चार खर्ब सात अर्ब ८८ करोड ८० लाख रुपैयाँ पुँजीगत खर्च गर्ने लक्ष्य राखेको थियो। आर्थिक वर्ष सकिन केवल एक महिना बाँकी रहँदा यो खर्च लक्ष्यभन्दा निकै कम छ।
यस अवधिमा चालु खर्चतर्फ ७६.९१ प्रतिशत अर्थात् ११ खर्ब ८० अर्ब ९८ करोड रुपैयाँ खर्च भएको छ। वित्तीय व्यवस्थापनतर्फ तीन खर्ब ७५ अर्ब २४ करोड २० लाख रुपैयाँको लक्ष्यमा हालसम्म तीन खर्ब पाँच अर्ब ७१ करोड ८१ लाख रुपैयाँ खर्च भएको छ।
