चितवनका किसानले यस वर्ष लगाएको चैते धानको समर्थन मूल्य पाउन सकेका छैनन्। साना किसान कृषि सहकारी संस्था लिमिटेडका अध्यक्ष रामशरण पाठकका अनुसार एक हजार हेक्टर क्षेत्रफलमा लगाइएको धानले तोकिएको समर्थन मूल्य नपाएको हो।
पूर्वी चितवनको खैरहनी नगरपालिकाका अधिकांश किसानले समर्थन मूल्य नपाउँदा दुःखी भएका छन्। भरतपुर महानगरपालिका २८, राप्ती कृषि तथा पशुपालन समूहका सचिव रञ्जीत पौडेलले समर्थन मूल्य नपाउँदा किसान निराश भएको बताए।
जिल्लामा चैते ५, हर्दिनाथ १, पिआर, टाइचिन जातका चैते धान खेती गरिएको थियो। पौडेलले समर्थन मूल्य नपाउँदा किसानलाई ठूलो मर्का परेको बताए।
कृषि विकास कार्यालय चितवनका प्रमुख झलकनाथ कँडेलले चैते धानको समर्थन मूल्य तोक्न सरकारले ढिलाइ गरेको कारण किसानले मूल्य नपाएको बताए। यस वर्ष चितवनमा नौ हजार हेक्टर क्षेत्रफलमा चैते धान खेती गरिएको थियो।
