कोशी प्रदेशका मुख्यमन्त्री हिक्मतकुमार कार्कीको सचिवालयका कम्प्युटर अपरेटर उमेश गजुरेलले पोस्ट गरेको भिडियोका कारण दुई युवा अनाहकमा थुनामा परेका छन्। सामाजिक सञ्जालमा भाइरल भएको उक्त भिडियोलाई सत्यता नबुझी प्रहरीले प्रयोग गरेपछि यो घटना बाहिर आएको हो।
गत बुधबार विराटनगरको महेन्द्र चोकमा युवतीहरूमाथि दुर्व्यवहार भएको भन्दै गजुरेलले आफ्नो मोटरसाइकलको क्यामेराबाट खिचिएको भिडियो पोस्ट गरेका थिए। भिडियोमा दुई युवा सवार मोटरसाइकलले जेब्रा क्रसिङ नजिकै बाटो काट्दै गरेका छात्राहरू नजिक पुग्दा पछाडिका युवाले हातले इसारा गरेको देखिन्छ। गजुरेलले यसलाई ‘छोएको’ वा ‘दुर्व्यवहार’ भनेर व्याख्या गरेका थिए।
तर, पक्राउ परेका युवाहरू महेश मण्डल र अखिलेशकुमार प्रसादले आफूहरूले छात्राहरूलाई जेब्रा क्रसिङबाट बाटो काट्न आग्रह मात्र गरेको बताएका छन्। स्वयं छात्राहरूले पनि आफूहरूमाथि कुनै दुर्व्यवहार नभएको र ती युवा निर्दोष रहेको स्पष्ट पारेका छन्। उनीहरूले प्रहरीलाई समेत बयान दिँदा युवाहरू निर्दोष रहेको बताएका थिए।
प्रहरीले सामाजिक सञ्जालमा भाइरल भएको भिडियोलाई भेरिफाइ नगरी, पीडित भनिएकाहरूसँग सोधपुछ नगरी र कुनै जाहेरीबिनै अभद्र व्यवहारको मुद्दा चलाउने तयारी गरेको छ। यो कार्यको सामाजिक सञ्जालमा व्यापक आलोचना भइरहेको छ।
घटनाका प्रत्यक्षदर्शी कृतिका तिम्सिनाले पनि प्रहरीले सत्यतथ्य नबुझी एक पक्षलाई पीडित र अर्को पक्षलाई दोषी बनाएको भन्दै पत्रकारिताको जिम्मेवारीमाथि प्रश्न उठाएकी छिन्। उनले घटनाको वास्तविकता नबुझी समाचार बनाइनु र सत्यतथ्य परीक्षण नगरी गलत रूपमा प्रस्तुत गरिनुप्रति आपत्ति जनाएकी छिन्।
पक्राउ परेका महेशकुमार मण्डलका भाइ नितेश मण्डलका अनुसार, उनीहरू आफैँ स्पष्टीकरण दिन प्रहरी कार्यालय पुगेका थिए। तर, प्रहरीले बयान लिएर छोड्ने भने पनि पछि थुनामा राखेको थियो। उनले युवतीहरूले ‘केही भएको छैन’ भनिरहँदा पनि प्रहरीले हचुवामा मुद्दा चलाउनु दुःखद भएको बताएका छन्।
