प्रमुख प्रतिपक्षी नेपाली कांग्रेसले प्रधानमन्त्री बालेन्द्र शाहलाई प्रतिनिधिसभा बैठकमा उपस्थित गराउन सभामुखसँग रुलिङ माग गरेको छ। बुधबारको बैठकमा सरकारले ल्याएको नीति तथा कार्यक्रममाथि छलफल भइरहँदा प्रधानमन्त्रीको अनुपस्थितिप्रति कांग्रेसले गम्भीर असन्तुष्टि जनायो।
कांग्रेस सचेतक निश्कल राईले सभामुखले तत्काल रुलिङ गरेर प्रधानमन्त्रीलाई सदनमा बोलाउनुपर्ने माग गरे। उनले नीति तथा कार्यक्रममा उठेका प्रश्नको जवाफ दिने कार्यसूची भए पनि प्रधानमन्त्री सदनमा नदेखिएको बताए।
राईले सभामुखलाई सभाको गरिमा र इज्जत राख्ने भूमिकामा रहेको भन्दै ‘हजुर हाम्रो नायक हो’ भनेर सम्बोधन गरे। उनले सभामुखले सदनको इज्जत राख्न नसके कसैले पनि गरिमा बढाउन नसक्ने स्पष्ट पारे।
यसअघि पनि प्रधानमन्त्रीको स्वास्थ्य अवस्थाबारे चिन्ता व्यक्त गर्दै सदनमा उनको उपस्थिति माग गरिएको राईले स्मरण गराए। उनले आज पनि अवस्था उस्तै रहेको बताए।
