काठमाडौँ। नेपाली कांग्रेसको १५औँ महाधिवेशनअन्तर्गत भोलि (असोज ७) देशभर एकसाथ पालिका तहको अधिवेशन हुँदैछ। वडा अधिवेशनबाट प्रारम्भ भएको महाधिवेशन प्रक्रियाले स्थानीय तहमा नयाँ नेतृत्व चयनको चरणमा प्रवेश गरेको छ।
केही छिटपुट स्थानबाहेक देशभरका वडाहरूमा शान्तिपूर्ण रूपमा नेतृत्व चयन सम्पन्न भइसकेको छ। केन्द्रीय निर्वाचन समितिले भोलिको पालिका अधिवेशन पनि सहज र सौहार्दपूर्ण रूपमा सम्पन्न हुने विश्वास व्यक्त गरेको छ।
निर्वाचन समितिले साङ्गठनिक कार्यतालिकालाई प्राथमिकता दिएको छ। बाढीपहिरोबाट प्रभावित नुवाकोट र धादिङका सबै वडाहरूमा आज अधिवेशन सम्पन्न भएको छ। मधेस प्रदेशका सिरहा, सप्तरी, सर्लाही र पर्साका केही बाँकी वडाहरूमा पनि आजै अधिवेशन सकिएको छ।
भीषण बाढीपहिरोका कारण क्षति बेहोरेको रसुवा जिल्लामा भने केही दिनपछि अधिवेशन गर्ने तयारी छ। निर्वाचन समितिका सदस्य सचिव राजु कटुवालले यो जानकारी दिएका छन्।
पार्टी केन्द्रीय समितिले २०८२ पुस २१ सम्म नवीकरण गरेका क्रियाशील सदस्यहरूलाई समेट्ने निर्णय गरेको थियो। यसले गर्दा केही स्थानमा सदस्यता सूचीलाई अन्तिम रूप दिन ढिलाइ भएको निर्वाचन समितिले स्पष्ट पारेको छ।
सदस्य सचिव अधिवक्ता कटुवालका अनुसार यो प्राविधिक विषय मात्र हो। देशभरको ठूलो तथ्याङ्क व्यवस्थापन गर्दा यो ढिलाइ भएको हो।
कांग्रेसको विधान र निर्वाचन निर्देशिकाअनुसार भोलि हुने पालिका अधिवेशनबाट पाँच पदाधिकारी चयन हुनेछन्। एक सभापति, एक महिलासहित दुई उपसभापति, एक सचिव र एक सहसचिव निर्वाचित हुनेछन्। कोषाध्यक्षको चयन सभापतिले गर्नेछन्।
पालिका कार्यसमितिमा प्रत्येक वडाबाट एक महिला र एक खुला सदस्य निर्वाचित हुनेछन्। युवा क्लस्टरबाट एक महिला र दुई खुला सदस्य चयन हुनेछन्। दलित समुदायबाट एक महिला र एक खुला सदस्य निर्वाचित हुनेछन्।
कार्यसमितिलाई समावेशी बनाउन गाउँ कार्यसमितिमा सात जना सदस्य रहनेछन्। नगर कार्यसमितिमा नौ जना, उपमहानगर कार्यसमितिमा ११ जना र महानगर कार्यसमितिमा १३ जना सदस्य मनोनयन गरिनेछ। निर्वाचनबाट प्रतिनिधित्व नभएका समुदायलाई प्राथमिकता दिइनेछ।
